IED, nasilat!

(Pikit, North Cotabato/ January 10, 2015) ---Nasilat ng mga otoridad ang Improvised Explosive Device o IED na nakalaan sana sa matataong lugar sa bayan ng Pikit subalit hindi na ito nagawa ng suspek na pasabugin matapos na masundan ng mga pulis sa madilim na bahagi ng kalye ng Datu Piang sa bayan ng Pikit, Cotabato alas 10:00 kagabi.

Sa report ng Explosive Ordnance Division o EOD ang nasabing pampasabog ay gawa sa bala ng RPG na hinaluan ng citric acid at nakakabit ito sa isang cellphone na nagsilbing triggering device.

Bigo namang mahabol ng mga otoridad ang nasabing suspek na nakasakay ng motorsiklo.

Pero patuloy naman ang ginagawang pagtugis ng mga otoridad.

Sinabi naman sa DXVL News ni Task Force Pikit Commander P/Supt. Jordine Maribojo na ang suspek sa paglalagay ng nasabing IED sa Datu Piang St., sa naturang bayan ay kamag-anak ng carnapper na kinilalang si Muslimen Kutina Kawil na kanilang napaslang makaraang manlaban ito sa mga operatiba ng pulisya sa Brgy. Poblacion ng Pikit noong Disyembre a-29 ng nakaraang taon.

Batay sa ulat ng pulisya, tinangkang parahin ng mga operatiba ng pulisya sa pangunguna ni P/Insp. Sindato Karim ang nagmomotorsiklong si Kawil pagsapit sa inilatag na checkpoint.

Pero sa halip na huminto, pinaharurot nito ang motorsiklong walang plaka sa direksyon ng Barangay Gli gli kaya humantong sa habulan hanggang sa sumiklab ang shootout.

Narekober ang cal. 45 pistol, mga bala, 2-plastic sachet ng shabu, pinatuyong dahon ng marijuana na nakabalot sa papel, tatlong piraso ng improvised lighter, at ang motorsiklo na pinaniniwalaang nakaw. Rhoderick Beñez