BREAKING NEWS: 3 sundalo, patay; 1 pa sugatan sa pagsabog ng IED na itinanim ng NPA sa Arakan, North Cotabato

By: Rhoderick Beñez

(Arakan, North Cotabato/ May 7, 2015) ---Patay ang tatlong mga sundalo habang isa pa ang sugatan makaraang sumabog ang pinaniniwalaang Improvised Explosive Device o IED sa bahagi ng Sitio Upper Lumbo, Brgy. Kabalantian, Arakan, North Cotabato alas 2:25 kahapon ng hapon.

Sa panayam ng DXVL News ngayong umaga kay Lt. Col. Jose Lustria, Commanding Officer ng 57th IB kinilala nito ang mga namatay na sina PFC Alfredo M. Callano, PFC Robert Quilangit at PFC Muhalidin Manampan habang kinilala naman ang sugatan na si CPL Ariel Blancia lahat mga tauhan ng Bravo company ng 57^th IB.

Batay sa ulat, galing umano sa kanilang headquarters sa bayan ng Makilala ang tropa ng sundalo na pinangunahan ni 2^nd Lt. Guzman at nagsagawa ng pag-papatrolya sa hangganan ng Sitio Upper Lumbo at Sitio Agila sa bayan ng arakan ng sumabog ang IED.

Agad namang nasundan ito ng palitan ng putok mula sa armadong pangkat ng New People’s Army o NPA na siya’ng responsable din sa pagtatanim ng nasabing pampasabog.

Tatlo agad ang binawian ng buhay sa hanay ng pamahalaan at isa ang sugatan habang hindi pa matukoy sa panig naman ng kalaban.

Pinaniniwalaang mga grupo ng CPP-NPA Front 53 ang na-engkwentro ng mga sundalo na may operasyon sa bayan ng Arakan; Kitaotao, Bukidnon Province at Davao City.