Grupong Midiyayong ng Midsayap, wagi sa Centennial Street dancing at Showdown competition provincial category; Mati City kampeon naman sa Mindanao-Open category

(Amas, Kidapawan City/ September 2, 2014) ---Tinanghal na kampeon ang Grupong Midyayong ng Midsayap Dilangalen National High School sa katatapos lamang na Kalivungan Festival Street Dancing and Showdown competition sa Provincial Sports Complex, Amas, Kidapawan City ngayong araw sa pagdiriwang ng ika-100 taon o centennial ng Cotabato.

Nanguna ang Grupong Midyayong sa score sheets ng mga judges dahil sa performance kabilang ang mahusay na synchronization, coordination, style at execution.

Nag-uwi ng premyong P150,000 at trophy ang Grupong Midyayong ng Midsayap mula sa Provincial Government of Cotabato.

Nagwagi naman bilang 1st runner up and Tribong Mauswago ng Alamada na tumanggap ng P100,000 at trophy, 2nd runner up ang Tribong Maguindanaon ng Aleosan na tumanggap ng P75,000 at trophy, 3rd runner up ang Grupong Kabakeño ng Kabacan na tumanggap ng P20,000 at 4th runners up naman ang Sabuyakan ng Matalam at Grupong Carmen ng Carmen na kapwa tumanggap ng tig-P20,000 at trophies.

Lahat sila ay tumanggap rin ng karagdagang P20,000 bawat isa bilang augmentation ng Provincial Government of Cotabato para sa kanilang mga nagastos sa patimpalak.

Samantala, tinanghal naman na kampeon sa Mindanao Open category ang Mati City, Davao Oriental na nagpakita ng ibayong husay ng performance. Nakapag-uwi ng P350,000 at trophy ang Mati City group.  Sila rin ang naging kampeon sa katatapos lamang na Kadayawan Indak-Indak sa Dalan sa Davao City.

Nagwagi naman bilang 1st runner up ang Edward National High School ng T’boli, South Cotabato na tumanggap ng P 250,000 at trophy at 2nd runner up ang Polomolok, South Cotabato group na tumanggap ng P150,000 at cash.

Pinasalamatan naman ni Gov. Emmylou “Lala” J. Taliñ-Mendoza ang lahat ng mga lumahok sa street dancing showdown. Ayon sa gobernadora, ipinakita ng bawat grupo ang angking husay ng bawat Cotabateño na nagbigay daan naman upang lalo pan pagyamanin ang kultura at tradisyon ng mga tao sa Cotabato.

Humigit-kumulang sa 50,000 tao ang dumagsa sa Provincial Capitol ngayon upang panoorin ang street dancing and showdown at makiisa sa iba’t-ibang mga aktibidad kaugnay ng culmination day ng centennial ng Cotabato Province. Jimmy Sta. Cruz