Bayan ng Kabacan, posibleng isailalim sa State of Calamity dahil sa nakaraang pagbabaha; mga naapektuhang pamilya sumampa na sa mahigit sa 2 libu

(Kabacan, Cotabato/ September 3, 2014) ---Nagpapatuloy pa ngayon ang ginagawang validation ng pamunuan ng Municipal Social Welfare and Development Office o MSWDO Kabacan sa mga lugar na sinalanta ng pagbabaha.

Ayon kay MSWDO Head Susan Macalipat sa panayam ng DXVL News abot na sa 2,903 na pamilya ang naapektuhan ng pagbabaha o katumbas sa 14,515 na mga indibidual buhat sa siyam na mga barangay na niragasa ng baha simula pa nitong nakaraang linggo.

Posibleng padadagdagan pa ang nasabing bilang dahil sa patuloy pang dumarating ang reports mula sa mga barangay.

Ipinaliwanag naman ng opisyal kung bakit hindi agad nakapagbigay ng ayuda ang pamahalaang Lokal, ito dahil sa may prosesong sinusunod dito.

Giit pa ni Macalipat na sa panahon ng kalimidad lahat ng mga reports ay dapat manggagaling sa barangay at noted ng kanilang punong barangay.

Dapat sa lebel din ng barangay mauna na silang magbigay ng tulong sa mga residente naapektuhan ng anumang kalamidad, at kukunin ang pondo mula sa Barangay Disaster Fund, ayon pa kay Macalipat.

Kaugnay nito, posibleng ngayong araw pa makapagbigay ng tulong ang LGU matapos ang ginawang assessment at emergency meeting na ipinatawag ni Kabacan Mayor Herlo Guzman Jr.

Dahil dito, planung isailalim sa State of Calamity ang bayan ng Kabacan para maipalabas ang pondo pantulong sa mga nabiktima ng nakaraang pagbabaha sa bayan ng Kabacan.

Posibleng magdeklara ng state of Calamity bukas ang Sangguniang bayan ng Kabacan batay naman doon sa report na isusumite ng Municipal Disaster Risk Reduction Council. Rhoderick Beñez