Pambansang Soberanya at Patrimonya sigaw ng ANAKBAYAN sa araw ng Kagitingan

(Kabacan, North Cotabato/April 9, 2012) ---Makatotohanang pambansang soberanya at patrimonya ang sigaw at panawagan ng militanteng grupo ng mga kabataan sa paggunita sa araw ng kagitingan ngayong araw.

IKinalulungkot ng grupong ANAKBAYAN na sa kabila ng paggunita sa araw ng kagitingan hindi naman umano binibigyang  pansin upang kilalanin ang tunay na pambansang soberanya at patrimonya ng ating bansa.

Ayon kay Darwin Rey Morante, tagapagsalita ng ANAKBAYAN North Cotabato ginugunita diumano ang pagkilala sa mga bayaning nagbuwis ng buhay para sa pagkamit ng tunay na demokrasya at kalayaan subalit sa kabila nito nananatili umano ang pagiging tuta ng administrasyong PNoy sa mga amo nitong kano.

Aniya, isang patunay diumano na ang pagsuporta nito sa isasagawang kauna-unahang multilateral balikatan exercises na gaganapin sa bansa sa ika-16 hanggang 28 ng buwan sa mga bayan ng Zamboanga, Jolo at Basilan. Hindi na lamang umano isang imperyalistang bansa ang makikibahagi sa gagawing pagsasanay militar kundi kasama na rin ang ibat-ibang mga kapitalistang bansa na lalahok rito.

Ikinababahala din ng grupo ang inaaasahang pagdating ng 6,000 US Troops sa bansa, 4,000 umano nito ay dadaong sa isla ng Zamboanga na pagdadaosan ng pagsasanay militar.

“Ang dagdag na presensya ng mga amerikanong sundalo sa bansa ay ang posibleng paglobo ng mga bilang ng paglabag sa karapatang pantao at ang direktang pagyurak sa ating pambansang soberanya at patrimonya. Pinatunayan na sa kasaysayan ang mga paglabag ng mga ito sa mga mamamayang Pilipino maging sa hanay ng Bangsamoro at hindi hahayaan ng sambayanan na magpatuloy ito.” Pagtatapos ni Morante.

Kaugnay nito, nakatakdang lalahok ang militanteng grupo ng mga kabataan sa isasagawang LAKBAYAN, isang Mindanao-wide caravan patungong Zamboanga City para sa isang malawak na mobilisasyon sa pagdating ng mga amerikanong sundalo sa bansa; WE LOVE MINDANAO, US TROOPS OUT NOW! Ang tema ng nasabing caravan.