Napocor, at iba pang ahensiya ng gubyerno na may kinalaman sa kuryente sinampahan ng kasong sibil ng isang mataas na opisyal ng Kidapawan City

(Kidapawan City/April 28, 2012) ---Sinampahan ng kasong sibil ng isang mataas na opisyal sa Kidapawan City ang National Power Corporation (NPC), kasama na ang iba pang ahensiya ng gubyerno, para ma-obliga ang mga ito na ibigay sa lungsod ang 25 porsiento ng kuryente na sinu-suplay ng dalawang mga geothermal power plants sa Mount Apo na pag-aari ng Energy Development Corporation o EDC.        

Dumating sa opisina ng Clerk of Court si Kidapawan City Vice-Mayor Joseph Evangelista, kasama ang dalawa nito’ng mga abogado, para isampa ang, “Mandamus with Prayer for Issuance of a Writ of Preliminary Injunction and Damages.” Nitong hapon ng Biyernes.

         

Maliban sa NPC, isinama rin sa kinasuhan ang Power Sector Assets Liabilities and Management (PSALM) Corporation, Department of Energy, at ang EDC.

         

Nilinaw ni Evangelista na ang pagsasampa niya ng kaso ay hindi bilang isang opisyal ng city government kundi bilang isang taxpayer at power consumer -- na tulad ng marami ay naaburido na sa nararanasang matinding krisis sa kuryente.

         

 Ang brownout sa North Cotabato ay tumatagal ng mula walo hanggang siyam na oras kada araw.

         

Ayon kay Evangelista, ang igigiit nila ay ang mabigyan ng direktang suplay ng kuryente ang Paco sub-station ng Cotabato Electric Cooperative (Cotelco) na nasa Barangay Paco ng lungsod na konektado sa 69KV transmission line na nagmumula sa Mount Apo geothermal power plants.

          

ANG PAGSASAMPA NG CIVIL CASE kontra sa ilang opisyal ng power industry ay pangalawa na, simula taong 2010 – nang naranasan din sa lalawigan at sa iba pang bahagi ng Mindanao ang matinding krisis sa enerhiya.

Ito ang kaso na isinampa noon ni dating Cotabato Governor Jesus Sacdalan na matagal ding nabinbin sa sala ng Regional Trial Court (RTC) branch 23.

Pagkatapos natulog nang halos tatlong taon, ngayong May 18 uli itinakda ng korte ang pagdinig sa kaso.

Pero nilinaw ni Atty. Cromwell Rabaya, isa sa mga abogado ni Vice-Mayor Evangelista, na ang isinampa nilang kaso ay kaiba raw sa civil case na isinampa noong 2010 ni Sacdalan.

         

Sa kaso raw na kanilang isinampa, maliwanag na ang hinihingi nila ay ang masiguro may kuryente na dadaloy sa mga sub-stations ng Cotelco patungo sa linya ng kuryente sa mga bahay-bahay, establisiemento, at iba pang facility sa Kidapawan City at service area ng kooperatiba, mula sa mga planta ng geothermal ng EDC.