25% na generation load dispatch; iginigiit na ibigay sa Cotelco at sentro sana ng magiging kilos protesta na na-postponed nitong Biyernes

(Kabacan, North Cotabato/April 30, 2012) ---Sinabi ni Cotelco OIC General Manager Engr. Godofredo Homez na nakasentro sana ang gagawing kilos protesta nitong Biyernes ng mga lokal na opisyal ng North Cotabato at mga power consumers ang panawagan na ibigay ang direktang 25% load dispatch mula sa Mt. Apo Geothermal Power plant sa Cotelco.

Ito kasi ang nakasaad sa batas na ER-94 na dapat ay may dalawampu’t limang porsientong load dispatch ang host community kagaya ng cotelco na direktang kukuha ng power supply mula sa Mt. Apo Geothermal Plant sa tuwing dadanasin ang power crisis, na di naman naipapatupad sa ngayon.

Dahil dito, magsasagawa sana ng malawakang pagkalampag ang mga lokal na opisyal ng North Cotabato na agad namang kinansela makaraang pakiusapan ni Interior and Local Government Secretary Jesse Robredo ang mga conveners ng naturang protest move.

Sa halip, ayon kay Mayor Rodolfo Gantuangco, ay pupulungin na lamang ni Robredo ang mga namumuno sa ansabing kilos protesta.

         

Bibista raw ang kalihim ngayong Huwebes.

Nakatakda sanang ilunsad ng grupong, NAPIKON SA BROWNOUT o Nagkakaisang Pinoy Kontra sa Brownout na pinamumunuan ni City Administrator Rodolfo Cabiles, Jr., ang caravan at rally, bilang pagpapakita ng kanilang pagkadismaya sa tila walang solusyon sa krisis sa kuryente na nararanasan ng taga-North Cotabato.

         

Dahil sa postponement, marami sa mga mamamayan ng North Cotabato ang nadismaya.

Ito na raw sana ang pagkakataon na maipakita sa buong Pilipinas at kay PNoy ang tunay na sentimiento nila sa nagaganap na krisis sa kuryente na nagsimula noon pang buwan ng Enero.