Ordinansa hinggil sa pagpapatupad ng “force evacuation” sa panahon ng sakuna sa bayan ng Kabacan, isinusulong ng SB

By: Mark Anthony Pispis

(Kabacan, North Cotabato/ May 14, 2015) ---Isinagawa ang public hearing hinggil sa ordinansang magpapatupad ng forced evacuation sa panahon ng sakuna sa bayan ng Kabacan na ginanap sa Kabacan Municipal gymnasium kahapon.

Ayon kay Sangguniang Bayan member Councilor Rhosman Mamaluba na siyang may akda sa nasabing ordinansa sa panayam ng DXVL News, ito ang kanilang nakikitang solusyon para maiwasan ang casualties sa panahon ng sakuna.

Inihalimbawa pa ng opisyal ang nagdaang pagbabaha sa Kabacan kungsaan ilan sa mga residente ng Kabacan partikular sa Plang Village sa Brgy. Poblacion at sa Sitio Abpa ng Brgy. ng Kayaga ay ayaw lisanin ang kanilang pamamahay kahit lubog na ito sa tubig baha.

Dagdag pa ng opisyal, alinsunod umano ang nasabing ordinansa sa layunin ng LGU Kabacan sa pamumuno ni Mayor Herlo Guzman Jr. na walang masasaktan o maitatalang casualties kapag may darating na sakuna sa bayan.

Nagpasalamat naman ang lokal na mambabatas sa positibong tugon ng mga residente sa nasabing ordinansa partikular na ang mga Brgy. Officials sa isinagawang public hearing kahapon.

Giit pa ni Rhosman, na maari na itong talakayin sa unang pagbasa sa sanggunian sa susunod na regular na session ng SB.