150MW ng Therma South Inc., inaasahang papasok na sa Grid sa susunod na buwan

By: Rhoderick Beñez

(Kabacan, North Cotabato/ May 14, 2015) ---Tiniyak ng pamunuan ng Therma South Incorporated, isang power generation sa Mindanao na pag-mamay-ari ng Aboitiz Power na papasok na sa susunod na buwan ang kanilang 150 Megawatts na supply ng kuryente sa Mindanao grid.

Ito ang sinabi sa DXVL News ni Aboitiz Power Corp. Corporate Branding and Communication Manager Wilfredo Rodolfo.

Ngayong buwan sana papasok ang unang unit ng planta, pero nabalam ito matapos ang nangyaring malawakang brownout sa buong Mindanao noong Abril a-5.

Sa ngayon nagpaptuloy ang synchronization at decommissioning process ng isang unit ng TSI at kung walang aberya na mangyayari ay maibibigay na nila ang 150MW.

Umaapela naman si Rodolfo sa mahigit dalawampung mga distribution utilities kasama na ang Cotelco na naka-kontrata sa kanila na pag-hati-hatian nalang muna ang unang 150MW na i-dedeliver na supply ng kuryente.

Ibigsabihin nito, makukuha na ng mga kooperatiba ang 50% na kontrata nila sa TSI at posibleng mabawasan ng kunti ang mahabang brownout sa Mindanao, lalo na sa service area ng Cotelco.

Samantala, napag-alaman na ang Mindanao ay largely dependent on hydroelectric power na bumubuo ng 52 percent ng generation mix nito.

Ang ibang sources ay geothermal, power barge at maging ang bunker fuel-fed power plants.

At ang pinaka-source ng hydroelectric power ay ang Pulangi River sa Bukidnon at ang Lake Lanao sa Marawi City.