1 Unit ng Bus, nahuli sa unang araw ng implementasyon ng malaking multa kontra kolurom

(Kabacan, North Cotabato/ June 20, 2014) ---Na-stranded ang ilang mga pasahero ng Rural Transit Bus matapos na mahuli ng Land Transportation Regional Office 12 kasama ang pinagsanib na pwersa ng Kabacan Traffic Management Unit at Kabacan PNP sa isinagawang kampanya kontra kolurom sa pangunahing kalye ng Kabacan, kahapon.

Sa panayam ng DXVL News sa Drayber ng Bus na pansamantalang pinatigil ang biyahe ng isang unit ng bus na minamaneho nito makaraang makitaan ng paglabag.

Kabilang sa nilabag ng naturang bus ay pagbiyahe na sira ang wind shield at hindi pag-comply ng ilang kaukulang dukomento.

Sinabi ni Kabacan LTO OIC Ansary Sumpingan na bukod sa nasabing bus abot naman sa 28 mga motorsiklo ang kanilang nahuli dahil sa iba’t-ibang paglabag sa batas trapiko kungsaan ilan sa mga nasabing motorsiklo ay naka-impound pa rin sa harap ng LTO Kabacan.

Buong araw na nagsagawa ng paglambat ang mga LTO sa pangunahing kalye ng Kabacan kahapon at ngayong araw naman ito gagawin sa Kidapawan City.

Inaasahang marami pa ang masasampolan ng nasabing batas.

Ang Joint Administrative Order (JAO) ng LTFRB, LTO at DOTC na ipinapatupad simula kahapon ay hindi para disiplinahin ang mga tsuper at operator kundi target lang na lumikha ng additional revenue para sa gobyerno.

Sa ilalim ng JAO, P1 milyon ang multa sa mga kolorum na bus, P250,000 sa taxi, P200,000 sa trak, P200,000 sa van, P120,000 sa sedan, P50,000 sa jeep at P6,000 sa mga motorsiklo.

Mai-impound din ang kanilang mga sasakyan ng 3 buwan. Rhoderick Beñez