(Update) 1 patay habang mahigit 200 pamilya nagsilikas na sa nagpapatuloy na bakbakan ng armadong grupo sa Matalam, North Cotabato

(Matalam, North Cotabato/ May 6, 2013) ---Patay ang isa katao na pinaniniwalaang kasapi ng Moro Islamic Liberation Front o MILF sa nagpapatuloy na palitan ng putok sa Moro National Liberation Front o MNLF sa Brgy. Marbel sa bayan ng Matalam alas 6:00 kaninang umaga.

Kinilala ni 108^th Base Command ng MILF Bangsamoro Islamic Forces kumander Masur Imbong ang namatay sa engkwentro na si Mikaratu Naga, 36 na taong gulang at residente ng nabanggit na barangay.

Si Naga ay binawian ng buhay ng magkaroon ng palitan ng bala ang grupo ni Kumander Datu Dima ambil ng Sebangan State Revolutionary Committee of the Moro National Liberation Front (SKSRC-MNLF).

Isang bahay sa Barangay Marbel ang nasira makaraang tinamaan ng M79 grenade launcher na pinakawalan ng grupo ni Ambil, ayon sa report.

Nagsimula ang bakbakan ng dalawang grupo alas 6:30 kagabi na dahilan ng pagkakalikas ng 200 pamilya mula sa anim na mga puroks at sitio ng bgry. Marbel.

Ayon sa report ng Matalam PNP, ang mga bakwit ay pansamantalang nanunuluyan ngayon sa brgy. hall ng Kibudok at Salvacion sa nabanggit na bayan.

Nagsimula umano ang nasabing labanan makaraang ang isang 16-anyos na lalaki buhat sa brgy. Marbel na may dalang baril ang pumunta sa isang tindahan.

Isang Toto Manial, pinaniniwalaang grupo ni Ambil ang sumita sa nasabing lalaki na may salukbit na baril at pwersahang kinuha ang nasabing caliber pistol.

Ang nasabing baril ay pag-mamay-ari ng kanyang tiyuhin na bagay naming ikinagalit nito at nagging mitsa ng sagupaan sa magkabilang grupo.

Itinanggi naman ng grupo ni Ambil ang pahayag ng kabilang kamopo, ayon sa report.

Sinabi ni Ambil na may una na silang pag-uusap sa MILF na papayagan nilang magsagawa ng information drive hinggil sa Framework Agreement on the Bangsamoro basta’t hindi magdadala ang mga ito ng baril sa loob ng teritoryo ng MNLF.

Inaangkin kasi ng MNLF ang brgy. Marbel na sakop ng kanilang teritiryo.

Abot naman sa 50 mga pamilya ang ngayon ay lumikas sa mas ligtas na lugar sa kalapit na brgy.  habang nagpapatuloy ang palitan ng putok sa dalawang naglalabang grupo na nagsimula pa alas 6:20 kagabi.

Inihayag ni Cotabato Police Provincial Director S/Supt. Danilo Peralta na may mga ideneploy na silang karagdagang pwersa ng pulisya para tiyakin ang seguridad sa mga evacuees sa lugar.

Naglagay na rin ng mga barikada ang sundalo at pulis para mapigilan ang pagpasok ng motorist sa pinangyarihan ng engkwentro.

Sa ngayon namagitan na ang Local Monitoring team na pinamumunuan ni Jabib Guaibar at Datu Edris ang deputy governor for Muslims ng North Cotabato para maresolba ang nasabing kaguluhan.

Ayon sa report 8:30 kaninang umaganakarinig ng malakas na pagsabog ang mga kalapit na residente sa lugar na mula umano sa brgy. Marbel.

Sa ngayon wala pang abiso ang pamunuan ng PNP at militar kung pababalikan na ang mga bakwit sa nasabing lugar. (Rhoderick Beñez)