Gov Emmylou “Lala” J. Taliño-Mendoza nanawagan sa mga Cotabateño na manatiling kalmado at mapagbantay sa harap ng mga pambobomba

AMAS, Kidapawan City (Jan. 28)- Sa kabila ng pagsabog ng isang pinaghihinalaang Improvised Explosive Device o IED sa Barangay Poblacion, Pikit, Cotabato dakong alas sais ng gabi kagabi at pagkakadiskubre sa isa pang IED malapit sa tower ng NGCP sa Pagalungan kahapon, nanawagan ngayon si Cot Governor Emmylou “Lala” J. Taliño-Mendoza na manatiling kalmado ngunit mapagbantay ang lahat.

Sa report ni Lt. Col. Aude Edralin, Commander ng 7th IB ng Phil. Army na nakabase sa Pikit, Cot. sinabi nitong lulan ng isang Baja motorcycle ang dalawang lalaki na pinaniniwalaang may dala ng sumabog na IED sa Pikit kung saan sumabog at naging sanhi ng kanilang kamatayan.

Kinilala ni Edralin ang mga nasawi na sina Asrap Mohamad, 28 year old, residente ng Barangay Balatikan, Pikit at Jhomar Palaguyan 27 years old, residente rin ng naturang barangay at siyang driver ng motorsiklo.

Patay on the spot si Mohamad habang dead on arrival naman sa Kabacan Medical Hospital si Palaguyan, ayon pa sa report.

Isang sibilyan naman ang tinamaan ng shrapnel na sumabog malapit sa isang convenience store na kinilalang si Frouline Hera, 36 years old, residente ng Barangay Calawag, Pikit. 

Ayon kay lt. Col. Edralin, ito na ang ikatlong pagsabog ng IED sa bayan ng Pikit mula noong nakalipas na linggo ngunit sa ikatlong pagkakataon ay mga suspected bomb couriers ang nasabugan ng bomba. 

Kaugnay nito, sinabi ni Gov Taliño-Mendoza sa lahat ng Cotabateño na huwag mag-panic at sa halip ay panatilihin ang pagiging kalmado.

Nanawagan din ang gobernadora na maging mapagbantay ang lahat at makipag-ugnayan sa otoridad sa anumang mababantayang kaduda-dudang mga indibidwal o mga bagay.

Ayon kay Gov. Taliño-Mendoza, ginagawa ng Provincial Government of Cot ang lahat upang mapanatili ang kapayapaan sa lalawigan at kaugnay nito, kailangang makipagtulungan ang mamamayan sa pulis at military.

Ginagawa rin daw ng pamahalaan ang lahat ng makakaya nito upang madakip ang mga suspect o mga may kagagawan ng mga pagpapasabog sa ilang bahagi ng Cotabato at mabigyan ng hustisya ang mga biktima ng mga IED explosions.  (JIMMY STA. CRUZ-PGO Media Center)