Mga naglalakihang celebrities darating sa Grand Coronation Night ng Mutya ng North Cotabato 2014 Centennial Queen

AMAS, Kidapawan City (Aug 25) – Kabilang ang tatlong former Bb. Pilipinas-Universe at Miss Universe runner-ups na sina Venus Raj, Shamcey Supsup at Ariella Arida at ang kasalukyang Bb. Pilipinas-Universe na si MJ Lastimosa sa mga bituin na darating sa Grand Coronation Night ng Mutya ng North Cotabato 2014 Centennial Queen.

Gaganapin ito mamayang gabi sa Provincial Capitol gymnasium, Amas, Kidapawan City bandang alas-sais.

Ayon kay Ralp Ryan Rafael, Focal Person ng Provincial Governor’s Office Media Affairs at Head ng Screening Committee at Technical Working Group ng search, kumpirmado na ang pagdating ng naturang mga celebrities upang makibahagi sa isa sa pinakamalaking aktibidad kaugnay ng centennial celebrations at Kalivungan Festival ng lalawigan ng Cotabato.

Si Venus Raj ang magiging host ng Grand Coronation Night at co-host nito ang up and coming male model na si Ken Alfonso.

Sina Shamcey Supsup, Ariella Arida at Bb. Pilipinas-Universe Lastimosa naman ay kabilang sa magiging judges ng Search for the Mutya ng North Cotabato 2014 Centennial Queen.

Bisita rin ng search ang asawa ni Shamcey Supsup na si Lloyd Lee.

Ayon ka Gov. Emmylou “Lala” J. Taliño-Mendoza, nais ng Provincial Government of Cotabato na maging lubos ang kasiyahan ng mga mamamayan ng Cotabato kaya inimbitahan ang naturang mga bituin.

Patunay rin daw ang pagtungo ng mga celebrities na sina Raj, Supsup, Arida, Lastimosa at sina Alfonso at Lee na mapayapa at matiwasay ang lalawigan ng Cotabato.

Maliban rito, nais rin ni Gov. Taliño-Mendoza na masilayan ng mga Cotabateño ang kanilang mga hinahangaang indibidwal ng hindi na pupunta pa sa Manila o sa ibang lugar.

Nais din ng gobernadora na mula sa 15 naggagandahang kandidata ay may susunod sa yapak ni Bb. Pilipinas-Universe MJ Lastimosa na nagbigay ng malaking karangalan sa Cotabato.

Si Lastimosa ay tubong Brgy. Sibsib, Tulunan, Cotabato.

Samantala, ang magwawaging Mutya ng Cotabato 2014 - Centennial Queen ay siya ring magiging Ambassadress of Peace ng Cotabato Province at magiging katuwang ng pamahalaang panlalawigan sa mga peace initiatives and programs sa loob ng isang buong taon.

Libre at walang anumang bayad ang panonood ng Grand Coronation Night at ang dapat lamang gawin ng mga manonood ay pumila ng maayos at sumunod sa mga security measures na ipatutupad ng otoridad. (JIMMY STA. CRUZ/PGO Media Center)