‘Tulay Para Sa Kapayapaan’ pinasinayaan sa dalawang barangay sa Midsayap, North Cotabato

(Midsyap, North Cotabato/ September 19, 2013) ---Pinangunahan kamakalawa ni North Cotabato First District Rep. Jesus Sacdalan ang turn- over ceremony ng dalawang bailey- type bridges sa ilalim ng proyektong ‘Tulay Para Sa Kapayapaan’ sa Midsayap, North Cotabato.

Ginawa ang seremonya sa Purok Rosas, Barangay Poblacion 8 at sa Barangay Lagumbingan dito sa bayan.

Abot sa higit P150,000 ang kabuuang halaga ng dalawang tulay.

Ang implementasyon ng proyekto ay magkatuwang na itinaguyod ng Department of Public Works and Highways o DPWH Cotabato Second District Engineering Office at ng tanggapan ng kongresista.

Nabatid na tumulong din ang pamahalaang pambarangay sa pamamagitan ng pagsagot sa project labor.

Lubos ang pasasalamat ni Poblacion 8 Barangay Chairperson Eduardo Doletin sa pagtugon ng mga ahensya ng gobyerno upang maipatupad ang proyekto sa kanilang lugar.

Aniya, ang nasabing tulay ay pakikinabangan ng limampung pamilya.

Samantala, inihayag naman ni Parents and Teachers Association o PTA President Sherwin Utlang na malaking tulong ang tulay na ginawa sa harap ng Joaquin Mostrales Elementary School sa Barangay Lagumbingan lalung- lalo na  sa mga mag-aaral at mga guro ng nasabing paaralan.

Matagal na umano nilang pinapangarap na mapalitan ang lumang tulay sa harap ng kanilang paaralan na nanganganib na ring masira. (Roderick Rivera Bautista)