Normal Load dispatch sa Cotelco; aasahan sa susunod na buwan

(Kabacan, North Cotabato/April 20, 2012) ---Posibleng matatapos na ang kalbaryo ng mga taga-North Cotabato patungkol sa problema sa kuryente sa mga susunod na buwan.

Ito dahil maibabalik na ang kontrata ng Cotabato Electric Cooperative o Cotelco na 28 megawatts mula sa NPC.

Ito ang sinabi ni Cotelco Spokesperson Vincent Lore Baguio sa panayam ng DXVL- Radyo ng Bayan kungsaan bukod sa 28 megawatts ay magagamit na rin nila ang dagdag na 8 megawatts mula sa Therma Marine Incorporated, isang private barge na pag-mamay-ari ng Abiotiz.

Ibigsabihin magiging normal na ang load dispatch ng cotelco sa mga member consumers nito.

Sa kabila nito, tila nanggagalaiti na rin sa galit ang ilang mga negosyante hindi lamang dito sa bayan ng Kabacan, kundi maging sa buong probinsiya dahil sa napeperwisyo na rin ang kanilang negosyo dahil sa abot pa rin sa anim hanggang pitong oras na power interruption ang nararanasan sa mga service area ng Cotelco, simula kahapon.

Sinabi ni Baguio, na nagsisimula ang brownout alas-7:00 ng umaga hanggang alas-12:45 ng hapon at muli itong ipinatutupad alas-5:00 ng hapon hanggang alas-10:00 ng gabi.

Kahapon, abot sa mahigit sa walong oras ang brown-out na nararanasan sa ilang service area ng cotelco partikular na ditto sa bayan ng Kabacan na bagay namang, ikinagalit sa ilang mga member consumers.

Sa panig naman ng USM hospital abot sa 16 na litro ng gasolina sa isang oras lamang na operasyon nila ang kanilang ginagasta bilang pantustos sa generator para lang tuloy-tuloy ang serbisyo ng nasabing hospital.

Ayon sa pamunuan ng nasabing hospital lugi na sila sa napakahabang power interruption na nararanasan sa bahaging ito ng Mindanao. (Rhoderick Beñez)