Pagpapalago sa industriya ng pagniniyog sa rehiyon 12, tinututukan ng PCA

(Carmen, North Cotabato/ October 27, 2015) ---Patuloy na tinututukan ngayon ng Philippine Coconut Authority o PCA sa Rehiyon 12 ang pagpapalago sa industriya ng Niyog.

Ito ayon kay PCA Regional Manager Tommy Jalos kasabay ng isinagawang 7^th Regional Management Committee meeting ng Department of Agriculture 12 sa Philippine Coconut Authority o PCA, Aroman, Carmen, North Cotabato kahapon.

Sinabi ni Jalos na ipinagpapatuloy nila ang planting at replanting program maliban pa sa fertilization program na pagbibigay ng libreng abono sa mga magsasaka ng Niyog.

Tinututukan din nila ang pagpapatupad ng RA 8048 na mas kilala sa tawag na ‘coconut preservation act’ na bawal ang pamumutol ng niyog na walang pahintulot mula sa PCA.

Maging ito ay pribado o maging ang government project na madadaanan halimbawa ng road widening ay kailangang kumuha ang contractor o ang DPWH ng permit mula sa PCA bago patulin ang puno ng niyog.

Ipinakilala din ni Jalos ang bagong programa nila sa PCA na Agro-hub.

Ito ay ang tinatawag na value-adding na hindi lang nakatutok sa copra para sa mantika kundi maging sa bunot na pwedeng kumita, sa tubig ng niyog ay pwedeng kumita at maging sa bao ng niyog ay pwedeng mapagkitaan na. Rhoderick Beñez