Mga kinumpiskang peke at unregistered na mga pestisidyo at abono; iniimbestigahan na ng FPA North Cotabato

(February 7, 2013) ---Kinumpiska ng mga empleyado ng Fertilizers and Pesticide Authority o FPA ang mga unregistered na mga pestisidyo at abono sa pitong mga tindahan sa North Cotabato,

Ayon kay FPA provincial coordinator Aletha Bornea, abot sa 91 litro ng iba’t-ibang klase ng abono at pestisidyo ang nasabat ng kanyang mga tauhan sa isinagawa nilang clean-up drive simula noong nakaraangbuwan.

Kabilang sa mga kinumpiska nila’ng foliar fertilizer ang Apex Crop Booster; Field Grow; Crop Booster; Inducer Miracle; Growth Hormone; at isang pestisidyo na ang brand name ay Insecticide.

Ang naturang mga brand ng abono at pestisidyo ay hindi naka-rehistro sa FPA, makikita ang mga tindahang ito sa mga bayan ng Libungan, Midsayap, Pikit, Matalam, at Kidapawan City.

Ayon sa report, dalawang mga magsasaka ang lumapit sa opisina ni Bornea upang i-report ang umano’y pagbili nila ng mga pekeng corn seeds. Kinilala ni Bornea ang mga ito na sina Alberto Liboon at Romeo Casonete na pawang taga-Pikit, North Cotabato.

Reklamo ng dalawa, abot sa 65 sako ng mga pekeng corn seeds na may tatak pa raw PR seed.com na tila orihinal ang kanilang nabili, pero no’ng itanim nila ay di naman tumubo.

Naka-impound ngayon sa opisina ng FPA ang mga nakumpiskang mga abono at pestisidyo habang inihahanda na ang mga kasong kriminal kontra sa mga may-ari ng naturang mga tindahan. Batay sa Presidential Decree 1144, papatawan ng penalidad ang sinumang mapatutunayang nagbebenta ng unregistered o pekeng nga abono at pestisidyo.

Kaugnay nito, mas pinaigting nila ngayon ang clean-up drive at imbestigasyon sa mga tindahang nagtitinda ng mga pekeng agricultural supply.

Layon ng ahensiya na linisin ang mga agricultural supply store mula sa mga hindi naka-rehistrong abono at pestisidyo.