Mahigit sa 2 libung mga pamilya; apektado ng mga pagbaha sa Kabacan, North Cotabato

(Kabacan, North Cotabato/ January 23, 2013) ---Sumampa na sa 2,556 na mga pamilya ang naapektuhan ng mga pagbaha sa bayan ng Kabacan, batay sa pinakahuling report kahapon ng Municipal Disaster Risk Reduction Council o MDRRMC.

Ayon kay Kabacan MDRRM Officer Dr. Cedric Mantawil sa pakikipag-ugnayan kay Municipal Social Welfare Officer Susan Macalipat abot na sa anim na mga brgy ang ngayon ay binaha dahil sa mga pag-ulan nitong mga nakaraang araw dulot na rin ng sama ng panahon sa bahaging ito ng Mindanao.

Sa datos na nakuha ng DXVL Radyo ng Bayan sa nasabing tanggapan kabilang sa mga brgy na sinalanta ng baha ay ang mga sumusunod: Cuyapon, Kayaga partikular na sa Sitio Lumayong, Sitio Punol, Sitio Kalakat, Sitio Crossing Liton, Sitio Malabuaya, Sitio Kibales, Sitio Basak, at Sitio Damanyog.

Ilan sa mga lugar na ito ay hanggang tuhod na ang tubig baha, ayon sa report.

Bukod sa nabanggit na lugar, binaha din ang Brgy. Salapungan, Brgy Pedtad, Brgy. Magatos, at Brgy. Nangaan.

Agad namang nagbigay tulong ang LGU-Kabacan sa mga residenteng naapektuhan ng nasabing baha.

Ayon kay Kabacan LGU Acting Supply Officer Mercedes Enanoria agad na naglabas ng pondo ang LGU buhat sa calamity fund para ipamahagi ang mga tulong na isang daang sako ng bigas, isang daang kahon ng noodles, limampung kahon ng sardinas, labing tatlong sako ng asukal at 2500 piraso ng kape.

Ang tulong ay naihatid na kahapon sa ilang mga residente na naapektuhan ng nasabing kalamidad.

Kung matatandaan, noong Disyembre a-13 ng nakaraang taon ay isinailalim sa State of Calamity ang bayan ng Kabacan na ideneklara ng Sanggunian batay sa panayam ng DXVL sa namayapang  dating vice Mayor Pol Dulay, dahil rin sa mga pagbaha makaraang humagupit ang bagyong Pablo na nag-iwan ng maraming kasiraan sa ilang lugar sa Mindanao at pagkasawi ng maraming buhay. (Rhoderick Beñez)