Isang abogado sa North Cotabato, nananawagan na magkaisa ang mga Pulitiko sa gitna ng kinakaharap na krisis sa kuryente

(Kidapawan City/May 8, 2012) ---Hinimok ngayon ni Atty. Cromwell Rabaya, isang private counsel ang mga pulitiko sa North Cotabato na dapat magkaisa para resolba ang problema sa brownout sa lalawigan sa halip na mag-watak-watak ang mga ito.

Ginawa ng opisyal ang pahayag dahil sa tingin nito ay nababahiran ng pulitika ang mga pagkilos ng mga pulitiko – kung usapin sa pagresolba ng krisis sa kuryente ang pag-uusapan.

Ginawang halimbawa ni Rabaya ang tila paninisi pa ng iba’ng pulitiko sa pagsampa ng kaso noong April 28 ni City vice-mayor Joseph Evangelista laban sa mga opisyal ng Department of Energy at ng iba pang power firm executives.

         

Tingin kasi ng ilang pulitiko, naging balakid ang naturang kaso sa pagkilos ng DoE para resolbahin ang problema sa kuryente sa North Cotabato.

         

Si Rabaya ang isa sa dalawang mga abogado ni Evangelista na kasamang nagsampa ng civil case o ‘mandamus with prayer for a preliminary injunction’ kontra sa naturang mga opisyal.

         

Sa kaso, iginiit ni Evangelista na mabigyan ng priority load dispatch na 25 percent mula sa mga planta ng geothermal ang Cotelco.

         

Ang kahilingang ito ang isa rin sa iginiit ng grupo ni City Administrator Rodolfo Cabiles, Jr., lider ng conveners group na, “Nagkakaisang Pinoy Kontra sa Brownout” nang makipagkita sila kay Energy Secretary Jose Almendras sa kalakhang Maynila, noong May 3.

         

Payo ni Rabaya, isantabi muna ang pulitika at pag-isahin ang kanilang pagkilos para may solusyon na ang krisis sa kuryente sa lalawigan.