Grupo ng mga raliyesta, maghahain ng motion for reconsideration sa USM Board of regents kaugnay sa Re-appointment ni Dr. Derije

(USM, Kabacan, North Cotabato/ January 17, 2013) ---Maghahain ng motion for reconsideration sa USM Board of Regents ang grupo ng mga raliyista na pinamumunuan nina Dr. Alimen Sencil, Mr. William dela Torre at sampung iba pa para ipawalambisa ang mosyon ng board na nagsasaad ng reappointment ni USM Dr. Jesus Antonio Derije.

Sa kopya ng motion for reconsideration na ipinarating sa DXVL Radyo ng Bayan, ipinaliwanag ng mga ito kung bakit nais nilang mairekonsidera ang desisyon.

Nang magsagawa ng special meeting sa tanggapan ng Commission on Higher Education sa Metro Manila, anim ang bumuto pabor habang 3 naman ang hindi pumabor sa panibagong 4 year-term ng Presidente.

Batay sa dokumento, nais nilang kwestyunin ang nangyari umanong pagpapalabas sa silid kung saan isinasagawa ang botohan kay Honorable Ronald Pascual na nakapanumpa nang bagong faculty Regent na nagrerepresenta sa USM Faculty. Si Regent Pascual ay hindi pinayagang makaboto nang wala man lamang umanong  sapat at balidong rason.

Dahil umano sa ginawang ito ng board ay nawalan ng tinig ang Faculty Association bilang isa sa mga pangunahing stakeholders ng pamantasan.

Pinagtatakhan din umano ng grupo na sa tatlong bumuto ng NO, apat ngayon ang nagsasabing NO ang kanilang naging boto na imposible umanong mangyari.

Kabilang sa mga bumoto ng NO sina Hon. Regent Jose Tuburan ng private sector at Regent Jalvi James Gaspan, student representative na kapwa pinaniniwalaan ng grupo na talaga ngang bumoto ng NO. Ang nakakalito anila, sina DOST Regional director Zenaida Raof Laidan at Alumni representative Regent Cedric Mantawil ay nagsasabi ring NO rin ang kanilang naging boto.

Muli ring ipinaliwanag ng mga ito ang principle ng majority vote na ang ibig sabihin ay 50% plus one.

Nalabag din umano ito dahil ang kabuuang bilang na bumubuo ng Board ay 11.

Anila ang 50% nito o kalahati nito ay 5.5 individuals plus 1 equals 6.5 pero ito raw ay equivalent to 7 dahil wala naman raw kalahating indibidwal.

Ibig sabihin raw nito, ang 6 votes pabor sa re-appointment ni Dr. Derije ay hindi majority vote.

Maliban dito, isinantabi umano ng Board ang samo’t-saring ebedensiya na graft and corruption laban kay Dr. Derije sa kabila ng mga complaints in inihain ng iba’t-ibang personalidad sa pamantasan.

Nabigo rin umanong i-require ng USM BOR si Dr. Derije na isumite ang lahat ng clearances at requirement para sa kanyang re-appointment batay sa umiiral na Civil Service Commission Law.

MAlinaw umano itong pag-abuso sa kapangyarihan ni Dr. Derije dahil dapat umanong naipresenta ang lahat ng mga dokumentong ito sa USM Board bago nagkaroon ng halalan.

Umaasa naman ang kanilang grupo na pagkatapos ng kanilang gagawing deliberasyon ay maglalabas ng order ng USM Board na magpapawalambisa sa re-appointment ng Pangulo at ang pagsasagawa ng eleksyon para sa bagong Presidente sa lalong madaling panahon. (Allan Guleng Dalo)