Mga batang survivors sa lumubog na pump boat sa Brgy Tamped, sumailalalim sa debriefing: Aktwal na pangyayari sa trahedya, ikinuwento ng isa sa mga nakaligtas

(Kabacan, North Cotabato/September 12, 2012) ---Sumailalim sa dalawang araw na debriefing ang sampung mga batang survivors sa nangyaring  paglubog ng sinasakyang Bangka sa Tamped River noong nakaraang lingo, Setyembre a-5, 2012.

Ang debriefing ay nagsimula kamakalawa Setyembre a-10 hanggang kahapon Setyembre a-11, 2012, sa pamumuno ng Municipal Social Welfare and Development Office sa pangunguna ni MSWDO Officer Susan Macalipat at LGU Kabacan.

Bilang bahagi ng debriefing, ang mga batang survivors ay ipinagshopping sa Superama Superstore ng mga gamit mula ulo hanggang paa at ipinasyal sa ibat ibang lugar dito sa bayan tulad na lamang ng pagbisita ng mga ito sa nangungunang radio station sa Kabacan, ang  DXVL Radyo ng Bayan Kool 94.9 FM.

Samantala, ikinuwento naman ng isa sa mga survivors sa panayam ng DXVL news ang aktuwal na pangyayari sa trahedya.

Ayon kay Abdulkadil Panigel, ang itinuturing na “hero” sa trahedya dahil sa pagsagip sa kanyang mga kapatid at guro, silang lahat ay kinabahan nang unti-unting lumulubog ang sinasakyang Bangka.

Dagdag pa ng batang bayani,  isinakay niya sa uling ang mga bata at guro sa  sako ng uling at unti unting dinala sa gilid ng ilog.

Tinig ni Abdulkadil, isa sa mga batang nakaligtas sa lumubog na Bangka.

Nagpapasalamat naman ang Prinsipal ng Tamped Elementary School na si Sonia S. Porcadilla sa tulong na ipinaabot sa kanila ng Provincial Government of North Cotabato sa pamumuno ni Governor Lala Talino Mendoza, LGU Kabacan na pinamumunuan ni Mayor George B. Tan, MSWDO-Kabacan, Kabacan PNP at ilan pang mga rescuers sa nangyaring trahedya. (Brex Nicolas)