Search for Centennial edifice at Centennial Cotabateño nagpapatuloy

written by: Jimmy Sta. Cruz

AMAS, Kidapawan City (June 6) – Tuloy-tuloy ang paghahanap ng mga entries para sa dalawang naglalakihang search kaugnay ng pagdiriwang ng ika-100 taon ng lalawigan ng Cotabato.

Ayon kay Joselito Pareñas ng Sangguniang Panlalawigan ng Cotabato at coordinator ng Search for Centennial Edifice at Heirlooms, mayroon ng 2 entries para sa pinakaluma o pinakamatagal na istruktura na naitayo sa Cotabato.

Ito ay ang isang bahagi ng municipal hall ng Magpet at isang paaralan sa Midsayap. 

Ayon sa report kapwa naitayo ang naturang mga istruktura halos 100 taon na ang nakalilipas.

Pero sasailalim pa sa kaukulang verification ng SP Cotabato ang nabanggit na mga entries.

Sinabi ni Pareñas na medyo mahirap ang paghanap ng mga entries dahil na rin sa mga marami ng mga bahay o gusali ngayon na sumailalim na sa repair at rehabilitation.

Sa kabila nito, tuloy naman ang SP Cotabato sa paghahanap ng mga entries lalo na sa mga liblib na lugar sa lalawigan at patuloy na hinihimok ang lahat ng Cotabateño na nagmamay-ari ng mga lumang bahay o gusali na lumahok.’

Hinimok din ni Pareñas ang mga Cotabateño na may mga minanang mga gamit o bagay na sumali sa search.

P50,000 ang nag-aantay sa mga mapipiling edifice at heirloom.

Samantala, abot naman sa 15 ang kalahok sa Search for Centennial Cotabateño o centenarian mula sa iba’t-ibang bahagi ng dating Cotabato Empire.

Ayon kay Engr. Ronald Montero, Focal Person-Coordinator ng naturang search, ang 15 na mga centenarian ay nakapagpatala sa Provincial Social Welfare and Development Office o PSWDO nitong nakalipas na mga buwan.

Ilan sa mga centenarian ay mula mismo sa Cotabato province habang ang iba naman ay nanggaling pa sa mga lalawigan ng Sultan Kudarat, Maguindanao, South Cotabato at patuloy na sumasailalim sa verification at validation.

Posible pa itong madagdagan dahil naglilibot pa si Montero sa iba’t-ibang mga lalawigan sa Region 12 upang hikayatin ang mga centenarian o mga pamilya nito na ipatala ang kanilang mga lolo at lola sa natatanging patimpalak.

P100,000 ang nag-aantay na premyo para sa magwawaging centenarian.

Ayon kay Cot. Governor Emmylou “Lala” J. Taliño- Mendoza, layon ng mga search na ito na bigyan ng kaukulang paggalang ang mga edifice o mga lumang mga bahay at gusali at mga mana sa lalawigan at ang mga taong naging bahagi na ng kasaysayan ng Cotabato.

Ang Search for Centennial Edifice at Heirlooms at Search for Centennial Cotabateño ay dalawa sa mga pangunahing aktibidad ng centennial celebration ng Cotabato province na itinuturing na makasaysayan at makabuluhan. (JIMMY STA. CRUZ/PGO Media Center)