Pangmatagalang kapayapaan sa Mindanao abot-kamay na – ayon kay Bangsamoro Transition Commission Chair Mohagher Iqbal

Written By: Jimmy Santacruz

Dumating na ang takdang panahon ng pagkakaisa at pagkakaunawaan sa Mindanao.  Ito ang sinabi ni Bangsamoro Transition Commission (BTC) at Moro islamic Liberation Front (MILF) Chief Peace Negotiator Mohagher Iqbal sa ginawa niyang courtesy call sa tanggapan ni Cotabato Governor Emmylou “Lala” J. Taliño-Mendoza noong Biyernes, Jan.17.

Kasama ni Iqbal ang 14 na mga miyembro ng BTC sa pagbisita sa provincial governor’s office kung saan nagbigay ng kanyang mensahe ng kapayapaan si Iqbal para sa mamamayan ng Cotabato.

Ayon pa rin kay Iqbal, matatapos na ang pagbuo ng Bangsamoro Basic Law sa buwan ng Abril ngayong taon. Ang Bangsamoro Basic Law o BBL ay siyang magiging basehan ng pamahalaang Bangsamoro sa oras na ito ay magiging prayoridad na batas ng Pangulong Noynoy Aquino at maaprubahan sa pamamagitan ng halalan sa 2016.

Inamin ni Iqbal na mas maraming malalaking hamon ang kinakaharap ngayon ng Bangsamoro at pamahalaan ng “Pilipinas sa usapang pangkapayaaan.

Kaugnay nito, nanawagan ang MILF official sa mga taga-Mindanao na bigyan ng pagkakataon ang pagtatatag ng Bangsamoro para mapatunayan ang magandang layunin nito. 

Ang mga miyembro ng BTC na dumating sa kapitolyo ay kinabibilangan nina Robert Alonto,  Akmad Sakkam, Hussein Muñoz, Asani Tammang, Pedrito Eisma, Ibrahim Ali, Raissa Jajurie, Johaira Wahab, Talib Benito, Melanio Ulama, Said Sheik at Abdulla Camlian.

Kasama rin sa delegado ng BTC ang pinuno ng International Monitoring Team mula sa Malaysia na si Major Gen. Dato Abdul Rahim bin Mohd Yusuff at iba pa. Mula naman sa kapitolyo ay dumalo sina Cotabato Board Members na sina Eliseo Garcesa, Jr., Cris Cadungon, Rogelio Marañon, Kelly Antao, Maybelle Valdevieso, Kelly Antao at Jomar Cerebo. Pinasalamatan naman ni Iqbal at mga commissioner ng Bangsamoro Transition Commission si Gov. Taliño-Mendoza sa aniya ay sinserong suporta ng gobernadora sa pagsusulong ng kapayapaan sa lalawigan.

Para sa BTC, si Gov. Taliño-Mendoza at ang mga opisyal ng pamahalaang panlalawigan ng Cotabato ay mga tunay na taga-pangalaga ng kapayapaan at katahimikan sa Mindanao.