Dagdag na mga silid-aralan hiniling ng dalawang eskwelahan sa Alamada, North Cotabato

(Midsayap, North Cotabato/ June 6, 2013) ---Bunsod ng malawakang pagpapatupad ng K to 12 program sa bansa at sa inaasahang pagdami ng mga mag-aaral ay gumagawa ng aksyon ang ilang public schools dito distrito uno ng North Cotabato.

Nais nilang iparating sa Department of Education o DepEd ang kakulangan ng mga silid aralan sa kanilang eskwelahan, ito ayon sa report ni PPALMA News Correspondent Roderick Bautista.

Partikular na hinihiling ngayon ng Barangiran Elementary School ng Alamada West District na kinakailangan nito ng three classroom- one school building type na pakikinabangan ng mga papapasok na kindergarten at mga batang mag- aaral mula sa ikatlo at ika-apat na baitang ng naturang paaralan.

Samantala, dagdag silid- aralan din ang kinakailangan ng Teren-Teren Elementary School sa Barangay Dado na nasa hilagang distrito ng bayan.

Ngayong taon, inaasahan ng nabanggit na paaralan na aabot sa dalawandaang mag-aaral mula kindergarten hanggang grade four ang papasok kaya nais nilang mapatayuan sila ng dagdag na dalawang school building.

Kaugnay nito ay nagpadala na ng magkahiwalay na sulat kahilingan ang dalawang pampublikong paaralan sa opisina ni Rep. Jesus Sacdalan.

Agad naman itong inendorso ng opisyal sa DepEd o Department of Education- Cotabato Division para sa karampatang aksyon.

Nabatid na ang K to 12 ay ang mas pinalawig na sistema ng edukasyon sa bansa kung saan kailangang dumaan muna ang mga mag-aaral sa kindergarten, anim na taon sa primary education, apat na taon bilang junior high school at dalawang taon naman sa senior high school.

Ayon sa Official Gazette ng gobyerno, sa kasalukuyan ay abot sa 32, 127 na ang naipatayong classrooms sa buong bansa at aabot naman sa 17, 939 na mga silid aralan ang nakaprogramang ipatayo ngayong 2013.