Diyalogo sa pagitan ng naglalabang grupo sa Tulunan, NCot, pangungunahan ng LGU

(Tulunan, North Cotabato/ May 28, 2013) ---Pangungunahan ng alkalde ng Tulunan, Cotabato ang isang diyalogo sa pagitan ng naglalabang armadong grupo at ng Barangay Peace Keeping Action Team o BPAT para matuldukan ang pag-aaway sa lugar.

Ayon kay 57^th Infantry Battalion Commanding Officer 1^st Lt. Manuel Gatus abot sa 72 mga pamilya ngayon ang nagsilikas matapos na maipit sa girian ng naglalabang grupo sa Brgy. Maybula sa nasabing bayan dahil sa mga serye ng nakawan ng mga alagang hayop.

Pangungunahan ni Mayor Lani Candolada ang isasagawang dialogo, ayon kay Gatus.

Imbitado sa nasabing diyalogo ang mga punong ehekutibo mula sa mga bayan na nalilibot sa lugar kasama na dito ang Datu Paglas, Maguindanao; Columbio, Sultan Kudarat at Tulunan, North Cotabato.

Batay sa report, ang mga responsabling cattle rustlers na siya’ng itinuturong pangunahing suspek sa nakawan sa brgy. Maybula kasi ay tumakas papunta sa boundary ng Datu Paglas at Columbio, na itinuturing na teritoryo ng 109^th base command ng Moro Islamic Liberation Front o MILF.

Dadalo rin sa nasabing diyalogo ang Tulunan PNP at ang 57^th IB.

Inilagay na rin sa lugar ang Peacekeeping forces ng sundalo at militar buhat sa Cotabato Provincial Police Office para tiyakin ang seguridad ng mga residente sa lugar sa posibleng pag-atake ng grupo ng mga cattle rustlers.

Sa inisyal na impormasyong nakarating kay PSI Ronnie Cordero, hepe ng Tulunan PNP ang mga armadong umatake sa brgy. Maybula ay mga pinaniniwalaang kasapi ng 109^th base command ng Bangsamoro Islamic Armed Forces ng Moro Islamic Liberation Front o (BIAF-MILF). (Rhoderick Beñez)