WAR against illegal drugs, ikakasa sa Kabacan

MILGOO: Jasmin Musaid

(Kabacan, North Cotabato/July 12, 2012) ---Naniniwala si P/SSupt. Cornelio Salinas na ang ilulunsad nilang Oplan Krislam ay solusyon para mabuwag ang talamak na illegal na droga sa bayan ng Kabacan.

Ayon sa opisyal number one ang Kabacan sa buong probinsiya ng North Cotabato sa mga nagsusuply ng illegal na droga partikular na ang shabu.

SSupt. Cornelio Salinas

Kaugnay nito, ilulunsad nila ang giyera na tatawaging total war against illegal drugs in North Cotabato kungsaan una nilang tutukan ang Purok Krislam dito sa bayan ng Kabacan kaugnay sa kampanyang ito.

Ginawa ng opisyal ang pahayag sa isinagawang emergency Municipal Peace and Order Council meeting o MPOC kahapon ng hapon na dinaluhan ng ilang mga lokal na opisyal ng bayan na pinangungunahan ni Vice Mayor Pol Dulay, mga heads of office ng LGU at ilang mga regular na miembro ng MPOC.

Inilatag naman ni P/Supt. Raul Supiter, hepe ng Kabacan PNP ang magiging aktibidad sa nasabing oplan krislam na gagawin sa mismong lugar ngayong araw ng Sabado Hulyo a-katorse.

Kabilang sa mga aktibidad na ito ay ang sumusunod: supplemental feeding program; Medical Outreach program, magbibigay din ng mga tsinelas ang mga pulis sa mga bata doon.

Pero ang nasabing laban, ayon kay Salinas ay hindi magtagumpay kung walang all out support ang LGU Kabacan na nasabing kampanya, kontra illegal na droga.

Sa panayam, tumanggi namang ihayag ng opisyal kung anung grupo ang malaking financier ng shabu sa Kabacan at anung lugar o probinsiya ito galing habang patuloy na vina-validate nila ang nasabing report.

Supt. Raul Supiter

Sa kabila nito, dadagdagan naman ang pwersa ng pulisya sa bayan para sa ilalagay na Task Force Krislam.

Sinabi pa ng provincial director na ang pinaka-ugat ng kriminalidad na nangyayari sa probinsiya ay dahil sa illegal na droga.

Nabatid sa report na nagkakahalaga umano ng abot sa P3.5M ang halaga ng isang kilong shabu na sinusuply sa bayan ng Kabacan, ayon sa report.

Kaugnay nito, panawagan naman ni SSupt. Salinas sa mamamayan na suportahan ang launching ng Oplan Krislam at higit na lahat ay iwasan ang paggamit ng illegal na droga.

Samantala, walumpung porsiento ng mga kaso sa korte ng Kabacan ay may kinalaman sa illegal na droga pero karamihan sa mga kasong ito ay ibinasura ng korte dahil sa hindi pagsunod ng mga arresting officer ng chain of custody.

Kaugnay nito, iginigiit ni councilor George Manuel sa Sanggunian na magsagawa ng training at seminar ang korte para sanayin ang mga pulis sa tamang proseso ng pag-aresto at para na rin di mabaliwala ang pagsisikap ng  mga pulis na maaresto ang mga drug users and pushers. (Rhoderick Beñez)