1 sugatan sa panibago na namang bakbakan ng naglalabang grupo sa Carmen, North Cotabato; mga nagsilikas na pamilya umakyat na sa mahigit sa 200

(Carmen, North Cotabato/May 21, 2012) ---Sugatan ang isang 35-anyos na lalaki makaraang sumiklab na naman ang nangyaring bakbakan ng dalawang grupo nitong umaga ng Biyernes sa may Sitio Misalan, Brgy. Tonganon, Carmen, North Cotabato.

Kinilala ni 6^th Division chief Public Affairs Col. Prudencio Asto ang sugatan na si Abubakar Ali, pinaniniwalaang lider sa grupo ni Teo Mananimbong ng Moro National Liberation Front o MNLF.

Batay sa report tumagal ng 15 minuto ang palitan ng putok sa naglalabang grupo na pinamumunuan ni kumander Karim Sagadan ng 110^th  Base command ng Moro Islamic Liberation Front.

Nagpalala pa sa nasabing sagupaan matapos na sumali sa bakbakan ang mga CVO’s ng nasabing Barangay.

Samantala, mabilis namang isinugod sa Aleosan District Hospital ang sugatan para malapatan ng karampatang lunas.

Samantala, umabot na sa 287 na mga pamilya ang nagsilikas matapos na maipit sa nasabing kaguluhan sa lugar.

Ang mga bakwit ay pansamantalang nanunuluyan ngayon sa brgy Lawili at Brgy Panay kapwa mga brgy sa bayan ng Aleosan.

Humupa ang nasabing palitan ng putok sa dalawang grupo matapos na dumating sa lugar ang tropa ng Bravo Company, 7IB na pinamumunuan ni 1Lt. Luis Banoey para i-pacify ang nag-aaway na grupo. (Rhoderick Beñez)