2 miyembro ng 4H Club sa Cotabato tutungo ng Japan

AMAS, Kidapawan City – (Feb 6) – Dalawang miyembro ng Head, Heart, Hands and Health o 4H Club of the Philippines, Inc. sa Cotabato  ang nakatakdang magtungo ng Japan para sa 11-month Young Filipino Farmers Training ngayong Abril, 2015.

Ito ay sina Joey Belonio ng Barangay Tambac, Tulunan at Ronald Ariate ng Barangay New Israel, Makilala, Cotabato na pawang mga representante ng Region 12 para sa naturang training kung saan nakasentro sa pinakabagong technical training para sa pagsasaka.

Ayon kay 4H Provincial Coordinator Judy Gomez, sina Belonio at Ariate ay sumailalim sa mahigpit na screening at examination ng Office of the Provincial Agriculturist o OPAG noong 2014 kung saan napabilang sila sa top 10.

Ang naturang top 10 naman ay kumuha ng pagsusulit sa Agricultural Training Institute o ATI noong Dec. 2014 kung saan sina Belonio at Ariate lamang ang nakapasa, ayon pa kay Gomez.

Matapos nito ay sumailalim sa 40-day Home Stay Module ang dalawa sa Sta. Cruz, Davao del Sur mula Dec. 8, 2014 hanggang jan. 16, 2015 bilang bahagi ng kanilang preparasyon sa training sa Japan.

Sa kanilang pagtungo sa Japan, bibigyan sila ng training patungkol sa pinakabagong technical farming skills and techniques na inaasahang magagamit sa kanilang pagbalik sa bansa matapos ang 11 buwan.

Tatanggap naman ng monthly allowance na abot sa 40,000 yen bawat isa sina Belonio at Ariate sa oras na makarating sa Japan at libre na ang kanilang matitirhan sa naturang bansa, ayon sa OPAG.

Kailangan na lamang tapusin ng dalawa ang 70-day Pre-Departure Orientation Course o PDOC mula Jan. 25 hanggang April 9, 2015 upang lalo pa silang maging handa sa pagtungo ng Japan.

Nakapaloob sa PDOC ang pagtuturo sa kanila ng Niponggo o Japanese language upang hindi sila mahirapan sa pakikipag-usap sa mga Hapon.

Kaugnay nito, natutuwa naman si Gov. Emmylou “Lala” J. Taliño-Mendoza sa ipinakitang husayt nina Belonio at Ariate sa larangan ng pagsasaka.

Patunay raw ito na kapaki-pakinabang ang mga programa at proyektong agikultura ng Provincial Government of Cotabato at malaki ang papel nito sa pag-unlad ng buhay ng mga magsasaka tulad nina Belonio at Ariate, dagdag pa ng gobernadora. (JIMMY STA. CRUZ-PGO Media Center)