Mga Van Drivers at operators, inireklamo ang paghuhuli sa kanila sa crossing papasok sa Midsayap, North Cotabato

(Midsayap, North Cotabato/ June 20, 2013) ---Umaalma ngayon ang ilang van drivers at operators hinggil sa umano'y paghuli sa kanila tuwing kumukuha sila ng pasahero sa crossing papasok sa downtown area ng Poblacion, Midsayap, North Cotabato.

Ayon sa report, problema para sa mga driver ng van ang paghuli sa kanila ng mga myembro ng Midsayap PNP traffic management group na may rutang Cotabato-Midsayap na kumukuha ng pasahero sa crossing patungong Poblacion proper.

Anila, wala umanong natatanggap na memorandum ang kanilang grupo at hindi rin sila tinawag para sa isang pagpupulong kaugnay sa ipinapatupad na ordinansa sa bayan.

Dagdag pa ng van operator, ang paghuli sa kanilang mga driver ay kasunod ng pagbubukas ng bagong Public Terminal ng Midsayap sa Barangay Sadaan ng bayan.

Bagama't bukas na ito sa publiko, maraming pa ring pasahero ang nag-aabang sa crossing Midsayap dahil abot umano sa 30 piso ang sinisingil ng ilang tricycle drivers sa mga pasaherong tutungo sa bagong terminal.

DEPENSA naman ni Midsayap PNP Chief, Senior Insp. Henry Narciso, naipabatid na ng lokal na pamahalaan ng Midsayap sa lahat ng bus at van drivers at operators ang bagong ordinansang ipinapatupad sa bayan.

Ito aniya ay ang Municipal Ordinance number 209 na nagbabawal sa mga bus at van drivers na kumuha ng pasahero sa crossing Midsayap.

Naniniwala din si Narciso na ipinatawag na ng Sangguniang Bayan ng Midsayap ang mga van at bus operators at driver upang pag-usapan ang ordinansa.

Tugon naman ni Narciso sa mahal na singil sa pasahe patungo sa bagong terminal ng bayan, hahanapan ito ng solusyon ng pulisya at Sangguniang Bayan.