25 anyos na may ari ng Cellphone Repair Shop; patay sa panibagong pamamaril sa Kabacan, Cotabato

(Kabacan, North Cotabato/July 31, 2012) ---Patay ang isang 25-anyos na negosyante makaraang pagbabarilin ng mga di pa nakilalang suspek gamit ang di pa matukoy na uri ng baril sa harap ng kanyang pwesto malapit sa Raymunds Bakeshops, Rizal St., National Highway, Kabacan, Cotabato alas 12 ng tanghali kanina.

Kinilala ni Supt. Raul Supiter, hepe ng Kabacan PNP ang biktima na si Joel Bita, 25 taong gulang, may asawa at may ari ng Xyris Cellphone Repair and Accessories Shop at residente ng Brgy. Dagupan ng bayang ito.

Nagtamo ang biktima ng tama ng bala sa kanan at kaliwang bahagi ng dibdib at tiyan nito na mabilis namang isinugod sa Kabacan Medical Specialist subalit ilang sandali lamang ang lumipas ay binawian na rin ito ng buhay.

Sa ngayon patuloy na iniimbestigahan ng mga otoridad ang motibo ng nasabing pamamaril.

Samantala, sa kabila ng panibagong insidente ng pamamaril sa Kabacan na ikinasawi ng isang 25-anyos na negosyante na si Joel Bita agad namang pinawi ngayon ni Supt. Raul Supiter, hepe ng Kabacan PNP ang pangamba ng publiko hinggil sa kasalukyang kinakaharap na peace and order ng Kabacan.

Aniya, bagama’t malaking banta sa seguridad ang nasabing insedente, sa kabuuan kontrolado naman nila ang katahimikan sa bayan.

Kung susumahin, abot na sa sampu ang pinaslang sa Kabacan sa loob lamang ng buwang ito, pero sa sampung insedente walang pang naresolba ang mga otoridad, ito dahil sa ayaw magsalita ng mga saksi sa pang yayari.

Ayon sa pinakahuling report na nakuha ng DXVL Radyo ng Bayan ngayong hapon, nabatid na ang suspek sa panibagong pamamaslang ay sakay umano sa isang kulay pula na Kawasaki single motorcycle papalayo patungo sa direksiyon ng Kayaga erya.

Hanggang sa mga oras na ito ay patuloy pang inaalam ng Kabacan PNP ang motibo sa nasabing pamamaril.

Posible umanong mga gun for hire ang mga suspek.

May mga anggulong tinitingnan ang mga otoridad kabilang na dito ang hold-up pero, premature pa ito para ibunyag habang nagpapatuloy ang kanilang imbestigasyon.

Sa kabila nito, umaapela naman si Supiter sa mga pamilya o mismong biktima ng nasabing pamamaril sa Kabacan na makipagtulungan sa kanila.

Tinukoy pa ng opisyal ang nangyaring ambush sa boundary ng Dagupan at Aringay kamakalawa kungsaan biktima dito ang magpinsan na sina Carl at Ringo Soriano na maswerte namang nakaligtas sa nasabing ambush.

Aniya, umatras na umano na magsampa ng kaso o ipursige dahil sa takot umano sa kanilang seguridad.

Pero ayon sa opisyal mas lalong gagawa ng krimenalidad itong mga masasamang loob kung walang may maglakas loob na magsumbong sa pulisya ng mga responsible sa nasabing insedente.

Samantala , patuloy namang tinutugis ng mga otoridad ang isang Toyota Pick-up Elf ang naka-hit and run sa isang estudyante ng Katidtuad High School sa bahagi ng Katidtuan National Highway alas 7:00 kaninang umaga.

Ayon kay P/Insp. Tirso Pascual sa panayam ng DXVL News ngayong umaga, patuloy na pinaghahanap na nila ngayon ang nasabing sasakyan na posibleng may plate # na PGG 108, PJJ108, PGG 109, PJJ 109, PGG 509 at PJJ 509.

Panawagan ngayon sa publiko na kung makita po ninyu ang nasabing sasakyan batay sa mga pagkakakilanlan ng mga nabanggit na plate #’s ay agad na ireport sa himpilan ng pulisya dahil sa ang nasabing sasakyan ay nakabangga ng isang estudyante at agad namang tumakas sa di malamang direksiyon.

Kinilala ng pulisya ang nabangga na biktima na si Marilou Rosaldo, 3^rd year High School nag-aaral sa nabnggit na eskwelahan at resident eng Carmen, North Cotabato. (Rhoderick Beñez)