Most wanted person sa Kidapawan City arestado ng PNP

(Kidapawan City/August 2, 2012) ---Arestado ng mga operatiba ng Kidapawan City PNP, sa pangunguna ng kanilang hepe na si Supt. Renante Cabico, ang number one most wanted person sa buong lungsod na kinilalang si Onofre Tejedor Nuenay, 43, na may kasong murder, attempted murder, at frustrated murder na naganap, dalawang taon na ang nakalilipas.

      

Ayon kay Cabico, halos isang buwan din nila’ng inoperasyonan si Nuenay bago ito ganap na naaresto, alas-230 ng hapon, kahapon, sa bahay nito sa Purok-Dos, Barangay Lanao ng lungsod.

      

Matagal na raw wala sa bahay niya ang suspect.

      

Pero may pagkakataon na umuuwi ito sa kanilang pamamahay at nagtatagal ng dalawa hanggang tatlong araw.

      

Kaya kahapon, naispatan na siya ng isang miyembro ng Kidapawan City PNP at inaresto noon din.

      

Si Nuenay ang itinuturong suspect sa pagpatay noong May 6, 2010 sa isang Johnny Magbanua at pagkakasugat ng isang Leo Laguindanum – kapwa mga supporter ng isang natalong kandidato noong nakaraang eleksyon.

      

Samantala, naaresto din ng PNP ang rubber tapper na si Richard Abolo, 24, ng Barangay Sibawan ng lungsod.

Isinasangkot si Abolo sa pagpatay noong 2010 sa isang Kier Adlawon.

     

Sa imbestigasyon, inamin ni Abolo ang krimen.

      

Kapwa nasa kustodiya ng Kidapawan City PNP ang dalawa. (MCM)