Diumano’y paratang na “Artificial” brown-out sa Mindanao; pinabulaanan ng NGCP

(Kabacan, North Cotabato/March 21, 2012) ---Wala umanong katotohanan ang paratang na kagagawan umano ng National Grid Corporation of the Philippines o NGCP ang nangyayaring brown-out sa bahaging ito ng Mindanao, ito upang i-pressure umano nila ang mga local officials para sang-ayunan ang pagsasapribado ng ilan pang natitirang mga power plant na pag-aari ng gobyerno.

NGCP Spokesperson
Atty. Cynthia Alabanza

Ito ang naging paliwanag ni NGCP Spokesperson Atty. Cynthia Alabanza sa panayam ng DXVL – Radyo ng Bayan, aniya batay umano sa EPIRA law bawal na panghihimasukan ng NGCP ang pagsasapribado ng Agus at Pulangi Plant.

Sinabi pa nito na wala rin umano silang makukuhang benepisyo kahit pa man isasapribado ang nasabing mga planta, dahil transmission lamang ang kanilang ibinibigay na serbisyo at hindi ang pag-gegenerate ng kuryente.

Giit pa ng opisyal na di rin umano nila kontrolado ang supply at maging ang mga kooperatiba bagama’t sila umano ang dinadaan o “highway” ng kuryente dahilan kung bakit nalalaman nila ang buong kalagayan ng power supply sa Mindanao.

Ginawa ng opisyal ang pahayag matapos sinabi ni Cotabato Gov. Emmylou “Lala” Talino Mendoza na artificial lamang umano ang nangyayaring malawakang brown-out sa Mindanao.

Gayunpaman, handa umano ang NGCP na makipag-ugnayan sa mga local officials ng Mindanao at sa lahat ng kinauukulan, para maipaliwanag nila ang nangyayaring krisis sa enerhiya sa Mindanao

.

Aminado rin si Atty. Alabanza na wala umanong tinatago ang NGCP sa naturang usapin, sa katunayan ay sumulat na rin ito kay MINDA chair Luwalhati Antonino at sa pamunuan ng Department of Energy kay Sec Almendras para sa nakatakdang diyalogo.

Dagdag pa nito na may niluluto na rin umano silang short term solution upang kung di man tuluyang masulusyunan ay maibsan lamang ang napakahabang brown-out sa bahaging ito ng Mindanao. (Rhoderick Beñez)