Mga Progresibong grupo sa North Cotabato, maglulunsad din ng kilos protesta hinggil sa pagbuwag ng “Pork Barrel”

(Kidapawan City/ August 26, 2013) ---Magsasagawa rin ngayong araw ang  mga progresibong grupo at iba pang civil society organizations sa North Cotabato bilang pakikiisa sa gagawing malawakang kilos protesta hinggil sa pagbuwan ng ‘Pork Barrel’.

Ayon kay Apo Sandawa Lumadnong Panaghiusa sa Cotabato (ASLPC) head Norma Capuyan kanilang iginigiit sa kongreso ang pagpasa ng batas na bubuwag sa pork barrel, na siya’ng naging pinagmulan ng korupsiyon sa gobyerno.

Kasama ang ilan pang mga progresibong indibidwal sa North Cotabato mamartsa ang mga ito sa mga pangunahing kalye ng Kidapawan City para kalampagin ang gobyerno na tuluyan ng tanggalin ang pork barrel sa mga senador at konggresista.

Samantala ang “Million People March” ay gagawin ngayong umaga sa Luneta Park sa Maynila kungsaan makikiisa rin ang mga kabataan na pangungunahan ng FOI Youth Initiative.

Kaugnay nito, sa ipinatawag na pulong pambalitaan ni Pangulong Aquino, sinabi nitong panahon na rin upang buwagin ang Priority Development Assistance Fund (PDAF) o mas kilala sa tawag na pork barrel ng mga mambabatas.

Sa halip ay bubuo ng bagong mekanismo ang Senado at Kamara upang matugunan ang pangangailangan ng mamamayan sa paraang tapat na paggamit ng pondo ng bayan at hindi masasayang.

Tiwala ang Pangulo na magagampanan ng inter-agency coordina­ting council na binubuo ng COA, DOJ at Ombudsman ang pag-iim­bestiga sa P10-B pork barrel fund scam na utak umano si Janet Lim-Napoles.

Nagulat siya sa ibinunyag ng COA Special Audit report sa paggamit ng PDAF noong 2007-2009. (Rhoderick Beñez)