16 na buwan na MOOE ng Marawi City Division, hindi pa naibigay!

(Marawi City/ November 9, 2015) ---Hanggang ngayon ay hindi pa rin naibibigay ng Department of Education DepEd-ARMM ang Maintenance, Operating and Other Expenses o MOOE ng Marawi City Division sa lalawigan ng Lanao del Sur.

Ito ang sinabi sa DXVL News ni Marawi City Schools Division Supt. Mona Macatanong kungsaan noon pang Hunyo 2014 hanggang ngayon ay ni-hold ng DepEd-ARMM ang kanilang MOOE.

Ayon kay Macatanong, walang dahilan ang ARMM-Deped na hindi nila ibigay ang MOOE ng nasabing sangay ng paaralan kasi lahat naman ng alegasyon at dahilan nila sa hindi pag-download ay natugunan naman ng Superintendent.

Una, naka-pagsumite ito ng kanilang liquidation sa kanilang resident auditor at ito ay aprubado ng kanilang dating Regional Secretary Jamar Kulayan at ikalawa ay kanyang na-ayos ang kanyang petsa ng kaarawan kaugnay sa kanyang pagretiro noon pang October 18, 2013.

Dahil dito, maraming mga school activities at mga transaksiyon ng Division ang nababalam dahil sa walang pondong gagamitin ang mga paaralan na nasasakop ng kanilang dibisyon.

Nag-sangla ng kanyang mga alahas at iba pang gamit si Macatanong para lang makapagpadala ng kanilang delegasyon sa Boys/Girls Scout of the Philippines nitong nakaraang buwan.

Maliban dito, apektado rin ang mga travel ng kanyang mga guro maging ang contract of service na empleyado ng kanyang Dibisyon.

Ayon kay Macatanong abot lamang sa P398,000 buwan-buwan ang MOOE ng kanyang kanilang dibisyon.

Kaugnay nito, naghain na rin ng reklamo si Macatanong sa Civil Service Commission at sa Korte Suprema at lumabas na ang desisyon pero hindi umano ito pinapansin ni ARMM Gov. Mujiv Hataman at maging ni incoming ARMM-DepEd Sec John Magno.

Dahil dito, bukas nakatakdang magtutungo ang kampo ni Macatanong sa ARMM-DepEd upang tutulan ang pormal na pag-designate kay Secretary Magno bilang kalihim ng Kagawaran.

Sinusubukan pang kunan ng pahayag ng DXVL ang panig naman ng ARMM-DepEd sa nasabing isyu. Rhoderick Beñez