Isang High Explosive na IED, nakita sa Pulangi river ng isang back hoe operator; Improvised landmine narekober sa Arakan

(Kabacan, North Cotabato/ December 17, 2012) ---Inaalam na ngayon ng mga otoridad kung sinu ang responsible sa pagtanim ng isang high explosive na Improvised Explosive Device o IED na nakita ng isang back hoe operator sa Pulangi river na nasa brgy. Pedtad, alas 11:45 ng umaga nitong Biyernes.

Ayon kay P/Insp. Tirso Pascual ng Kabacan PNP nabatid na isang 81milimeter mortar ang nakitang pampasabog sa nabanggit na ilog. Nakita ito ni Jerry Besana, back hoe operator habang ito ay kumukuha ng gravel 50 metro ang layo mula sa pulangi river.

Sa tulong ng Explosive ordnance team agad namang nadispose ang nasabing bomba alas 3:50 ng hapon nitong Biyernes.

Patuloy pa ang ginagawang imbestigasyon ng mga otoridad kung may kaugnayan ang nasabing pampasabog sa mga terroristic attack o pananabotahe sa bahaging ito ng North Cotabato ng mga masasamang elemento.

Naka alerto naman ngayon ang Kabacan PNP partikular na ngayong papalapit ang kapaskuhan at pagsalubong ng bagong taon.

Samanatala, sa bayan ng Arakan ---ILANG metro lamang mula sa sementadong kalsada sa Sitio Saje, Barangay Malibatuan, Arakan, North Cotabato inilagay ng di pa nakilalang mga suspect ang improvised landmine na natagpuan ng isang magsasaka alas siyete ng umaga kamakalawa.

             Ayon kay Arakan Chief of Police Sr. Inspector Rolly Oranza, binubuo ng PVC pipe, blasting cap, firing device na nakalagay sa isang malaking lata at kinabitan ng duplex wire ang naturang landmine na may bigat na 8 kilo.

             Inilagay ang landmine sa tabi ng kalsada malapit sa tulay ng Sitio Naje at posibleng target ng naglagay nito ay ang tropa ng 10^th Special Force ng Phil. Army na nakabase sa Arakan, ayon pa kay Sr. Insp. Oranza.

             May kakayahan raw puminsala ng malalaking sasakyan ang natagpuang landmine at pumatay ng sinumang tamaan kung sumabog, sinabi ni Oranza.

             Nasa kustodiya na ngayon ng army ang naturang pampasabog para sa karagdagang imbestigasyon.

             Napag-alamang may on-going clearing operation ang military sa Barangay Malibatuan laban sa mga miyembro ng New Peoples’ Army at may kaugnayan raw ito sa operasyon ng army sa kalapit bayan ng Magpet.

             Matatandaang noong July 21, 2012 ay narekober rin sa isang sitio ng Barangay Malibatuan, Arakan, ang kahalintulad na improvised landmine na inilagay umano ng armadong grupo at target ang army.