Pag-debelop ng Fruit and shoot borer-resistant na Talong sa Pilipinas, kinuwestiyon; Field trial ng BT Talong sa USM nasa ika-9 na harvest na

(USM, Kabacan, North Cotabato/June 9, 2012) ---Nilinaw ngayon ni Dr. Lourdes Taylo, Ph. D in Entomologist ng Institute of Plant Breeding mula sa University of the Philippines Los Baños Laguna na hindi nakakasama ang BT Talong o Bacillus thuringiensis sa kalusugan ng taong kakain nito.

BT Talong at USM Field Trial

Ito dahil iba ang bituka ng fruit and shoot borer na pangunahing pumipinsala sa talong na siyang target lamang ng BT, ayon kay Taylo.

Dr. Lourdes Taylo, Ph. D. Entomologist

Paliwanag pa nito na ang bituka ng nasabing insekto ay alkaline taliwas naman sa bituka ng tao na acidic kungsaan walang ring receptor ang tao ng BT.

Ginawa ni Dr. Taylo ang pahayag matapos na magpalabas ng writ of kalikasan ang supreme court laban sa commercial production ng kontrobersiyal na BT Talong na kilala rin bilang genetically modified eggplants.  

Dr. Concepcion Bravo, BT Co-project leader

Ito makaraang hilingin ng grupong Greenpeace sa korte na desisyunan ang naturang usapin na posibleng panganib sa kalusugan ng ginagawang field trials para sa BT Talong.

Pero ayon kay Taylo, wala umanong karapatan ang nasabing grupo na bumunot o sirain ang mga field trials dahil wala pa namang inilabas na desisyon ang korte suprema hinggil dito.

Sa kabila nito, giit kasi ng grupong greenpeace na dapat ay gawin ang trial sa laboratoryo at hindi sa open fields dahil nakakasama umano sa kalusugan.

Sagot naman ni Dr. Taylo na di ma-e-evaluate ang performance ng halaman kung matatag o may resistensiya sa insekto kung ilalagay umano sa loob ng laboratorya, na siya namang iginigiit ng mga grupong anti-BT. 

Kaugnay nito, ngayong araw ang ika-siyam na harvest na ng BT Talong sa USM Field trial na nasa USMARC malapit sa Philippine Carabao Center na may 6,000 square meters ang area na pinagtamanan, ito ayon kay Co-project leader/entomological aspect Dr. Concepcion Bravo ng Dept. of entomology mula sa College of Agriculture ng USM.

Kahapon isinagawa ng study visit sa erya upang alamin ang mga magagandang maidulot ng BT talong lalo na sa mass production ng Talong sa Pilipinas.

USM BT Talong BPI Bio Safety Permit

Kungsaan suportado rin ito ng USM sa pangunguna ni USM Pres Dr. Jess Derije, mga lokal na opisyal ng LGU Kabacan at probinsiya.

Nanguna sa pagbisita si Board Member Vicente Suropia Jr. ang Committee chair in agriculture ng Sangguniang Panlalawigan, Kabacan Vice Mayor Pol Dulay, SB chair on Agriculture Jonathan Tabara, ilang mga imbitadong bisita mula sa UPLB, Vice President for Research and Extension Dr. Emma Sales at iba pa.

Nabatid na ang Talong na may scientific name na Solanum Melongena L. ay isang uri ng gulay na pinahahalagahan sa buong mundo. Ang bunga ay maaring hugis itlog, pahaba o bilog at ito ay mabuting pinanggagalingan ng bitamina, ‘fibers’ at mineral. (Rhoderick Beñez)