Bangkay ng lalaki na natagpuan sa Carmen, North Cotabato; kinilala na ng kanyang kamag-anak

(Carmen, North Cotabato/June 8, 2012) ---Kinilala na ng kanyang asawa ang bangkay ng lalaki na natagpuan sa brgy. Kimadsil, Carmen, North Cotabato noong hapon ng Martes.

Ayon kay Chief Inspector Jordine Maribojo, hepe ng Carmen PNP mismong ang Misis nito na si Maelene Grace Chee, 29 na taong gulang ang kumilala na ang mister nitong nawawala ang natagpuan sa nasabing lugar.

Kinilala ang biktima na si Robert Chee, 36 na taong gulang at residente ng Cagayan de oro City, ayon sa misis nito.

Sa inisyal na pagsisiyasat ng mga otoridad nabatid na nito pang umaga ng June 1 nag-paalam umano sa kanyang misis ang biktima para mamasada sa kanyang taxi pero nung gabing iyon ay di na naka-uwi si Robert.

Duda na ang kanyang misis na baka may masamang nangyari sa mister, kaya agad nitong tinawagan at walang may sumasagot sa tawag nito.

Sa isinagawang follow up investigation ng Carmen PNP sa Pikit PNP napag-alaman na isang kulay puting Toyota na may plate # KVZ-139 ang narekober matapos na inabandona partikular malapit sa bahay ng isang Usop Manuel na nasa boundary Brgy. ng Kabasalan-Bulol, Pikit, Cotabato ng mga elemento ng Pikit PNP at ng 7^th IB.

Nakita pa ng otoridad ang mga dugo sa loob ng nasabing sasakyan.

Sa follow up coordination ng mga pulisya sa Cagayan de oro City Police Office, doon napag-alaman na ang nasabing sasakyan ay kinarnap noong pang a-uno ng Hunyo.

Sa blotter log book tumugma ang plate number ng kinarnap na sasakyan sa inabandonang sasakyan na narekober sa bayan ng Pikit.

Duda ang mga otoridad na posibleng binayaran ng malaki ang biktima ng mga suspek dahilan kung bakit ito sumama.

Pero ang di alam ni Chee ay cacarnapin pala ang sasakyan nito, at ang masakit pa ay pinatay ito at itinapon sa masukal na lugar sa brgy Kimadsel.

Posibleng pinatay ang biktima sa loob mismo ng taxi nito.

Tinangay naman ng mga salarin ang sasakyan nito hanggang sa makarating sa bayan ng Pikit bago inabandona.

Sinabi ni Marobojo na ngayong araw ibibiyahe ang mga labi ni Robert papauwi sa kanilang bahay sa Cagayan de Oro city habang subject for manhunt na ngayon ng otoridad ang mga salarin. (Rhoderick Beñez)