Dalawa sugatan sa salpukan ng mga motorsiklo sa Tulunan, North Cotabato

(Tulunan, North Cotabato/June 4, 2012) ---Kapwa tumilapon sa kani-kanilang minamanenehong motorsiklo ang dalawang lalaki matapos magsalpukan sila sa gitna ng highway sa Barangay Poblacion sa bayan ng Tulunan, North Cotabato, alas-730 ng umaga, kamakalawa.

         

Sugatan sa salpukan sina Sgt. Roni Pancho ng 57^th Infantry Battalion ng Army, at Ronilo Selda, 44, na residente ng Barangay Sibsib, Tulunan.

Ayon sa motoristang si Selda, binabaybay niya ang highway patungo ng Poblacion sa Tulunan at tatawid na sana siya sa intersection nang biglang salpukin siya ng motorsiklo ni Sgt. Pancho.

         

Dahil sa bilis ng mga pangyayari, ‘di na nagawang umiwas ni Selda at maging siya tumilapon na rin sa kalsada.    Natapon rin sa kabilang daan ang sundalong si Pancho, ayon sa report.

         

Kapwa isinugod sa Kidapawan Medical Specialist Center sa Kidapawan City ang mga sugatan para lapatan ng lunas.

         

Si Selda nagtamo ng sugat sa ulo, kamay, at paa.

Pero ang sundalong si Pancho nananatili sa intensive care unit dahil sa matinding sugat sa ulo.