DXVL 94.9 KOOL FM

Subsidiya sa binhi ng palay ibinalik ng  DA

Magandang  balita para sa mga  magsasaka  ng  palay sa Rehiyon Dose,  ibinalik na  ng  Department of Agriculture ang  subsidiya sa  binhi ng palay.

Sa report mi Danilo doguiles ng PIA-12 mula sa isang  pulong-balitaan  kahapon, iniulat ni  Rey Embahador,  Regional Agri-Pinoy Rice Coordinator ng  DA-12 na inutos  kamakailan ni Agriculture Secretary Proceso Alcala ang  pagbabalik ng   Rapid Seed Supply Financing Project (RaSSFiP) at  pagpapalawig nito hanggang Disyembre 2011.

Ang  RaSSFiP  ay ang  programa ng   DA at  National  Food Authority (NFA) na nagbibigay ng  50 porsiyentong diskwento sa  binhi ng palay na  bibilhin  ng  mga  magsasaka.

Sa  ilalim ng  programa,  P600 lang  ang  halaga ng   bawat  bag ng certified  inbred  seeds para mga  magsasaka ng palay, ayon kay Embahador.

Kaugnay  rito, sinabi ni  Embahador  na  target ng  DA 12 at NFA na  makapamamahagi ng  dalawampu’t pitong libong (27,000) bag ng certified  inbred  rice seeds sa  buong  rehiyon.

Ang alokasyon  bawat  probinsiya ay ang  sumusunod:  9,300 sa South Cotabato, 9,300 sa  Sultan Kudarat,  5,680 sa North Cotabato, at 2,720 sa Sarangani.

Para mapakinabangan  ang  subsidiya ng   pamahalaan,  kailangan lamang   magpatala ng  mga magsasaka  sa municipal  agriculture office.

Ang  RaSSFiP ay bahagi ng  mga programa ng pamahalaan ni Pangulong Benigno Aquino III na naglalayong  makamit ng bansa ang “rice sufficiency”  sa  taong  2013.