(Update) 9 patay, 4 sugatan sa magkahiwalay na pagsabog sa North Cotabato; nangyaring pag-ambush sa mga sundalo, kinondena ni Governor Mendoza

(Tulunan, North Cotabato/ October 22, 2013) ---Umakyat na sa siyam ang namatay, anim dito mga sundalo habang apat naman ang malubhang nasugatan sa nangyaring pananambang ng mga pinaniniwalaang New People’s Army sa magkahiwalay na lugar sa North Cotabato alas 9:30 kahapon ng umaga.

Kinilala ni 57^th Infantry Battalion Commanding Officer Lt. Col. Noel dela Cruz ang mga nasawi na sina Cpl. Bansuan, Cpl. Espiritu at Pfc. Baylon lahat mula sa 57^th IB; First Sgt. Hadlukon at Sgt. Ocho kapwa mula sa 38^th IB; at mga kasapi ng CAFGU na kinilalang sina Ballesteros, Batuslac at Tanducan. 

Nabatid sa report na isang mataas na opisyal ng sundalo ang iniulat na namatay na kinilalang si Captain Ernesto Aguilar ng 38^th IB pero wala pa itong kumpirmasyon mula sa hanay ng mga sundalo.

Sinabi ni Dela Cruz na sumabog ang landmine sa Barangay Bituan sa bayan ng Tulunan ng padaan ang sinasakyan ng mga sundalo para maghatid sana ng allowance ng mga Cafgu at ng kanilang pagkain ng mangyari ang insedente.

Pito ang iniulat na patay on-the-spot sa nangyaring pagsabog.

Makalipas ang tatlumpung minuto, isang malakas na pagsabog din ang yumanig sa Barangay Luna Sur sa bayan ng Makilala kungsaan target dito ang pagdaan ng KM45 military vehicle lulan ng mga sundalo.

Patay on the spot si Cpl. Espiritu sa pagsabog ng landmine, ito ayon kay Lt. Bruno Hugo na magresponde sana sa naunang ambush sa mga CAFGU at mga kasapi ng 38^th IB.

Nawala rin ang bag na dala ni Captain Hugo na naglalaman ng sahod ng mga CAFGU.

Sa kanyang Press Release na inilabas kahapon, mahigpit na kinokondena ni

Cotabato Governor Emmylou Lala Mendoza ang nangyaring pag-ambush at pagpapasabog ng Landmine ng mga pinaniniwalaang NPA laban sa tropa ng pamahalaan sa bayan ng Tulunan at Makilala.

Aniya, wala umanong lugar sa isang sibilisadong komunidad ang ginawa ng mga rebeldeng grupo lalo na paggamit ng mga ito ng landmine na matagal ng ipinagbabawal sa international covenants.

Mariing kinondena nito ang nasabing karahasan sa kabila ng ginagawa nito ang lahat para mabigyan ng solusyon ang ilang armadong gusot. Rhoderick Beñez