“Justice on Wheels”, paglilitis ng kaso Sa loob ng bilangguan –malaking tulong ayon sa BJMP

(Amas, Kidapawan city/ October 30, 2012) ---Aminado ngayon si Jail Chief Inspector Mary Chanette Espartero na malaking tulong ang isasagawang “Justice on Wheels”, ng korte suprema sa malaking bilang ng mga bilanggo sa BJMP North Cotabato District Jail kung sakaling masimulan na ito.

Ito ang inihayag kahapon ng opisyal sa isang pulong pambalitaan sa tanggapan ng Bureau of Jail Management and Penology North Cotabato District Jail sa Amas, Kidapawan City kasabay ng pagtatapos ng National Corrections Consciousness Week.

Ang nasabing hakbang ay deriktiba ni Cotabato Governor Emmylou “Lala” Talino Mendoza sa tulong ng Provincial Legal Office.

Ang Justice on Wheels ay programa ng Korte Suprema kungsaan, dadalhin ang korte sa piitan, ibig sabihin nito, ang mga hukom ang pupunta sa mga detainees para doon didinggin ang kaso.

Tinawag na Justice On Wheels dahil may bus na denisenyong parang court room at doon isasagawa ang hearing ng kaso.

Posibleng masisimulan na ang nasabing programa ngayong buwan ng Nobyembre, ayon pa kay Espartero.

Giit pa ng opisyal na malaking tulong ang nasabing hakbang ng gobyerno sa congestion ng mga balanggo dahil abot sa mahigit sa 100 mga preso ang makakalaya.

Samantala, nabatid mula kay Espartero na may 30 mga high risk detainees ang kanilang bilangguan kagaya ng MILF, NPA at mga miyembro ng organized crime group.

Apat dito ang inilipat sa Metro Manila ngayong taon matapos ang ipinalabas na supreme court ruling.

Kaugnay nito, sinisikap naman ng opisyal na kayang nilang ma protektahan ang seguridad ng kulungan maliban pa sa isinasagawang nilang koordinasyon sa intelligence community araw-araw para alamin kung may banta sa seguridad ng jail at agad silang magpapatawag ng augmentation mula sa Philippine National Police at hukbong Sandatahang Lakas ng Pilipinas. (Rhoderick Beñez)