Estado ng Renewable Energy Service Contract o RESC Exploration sa North Cotabato, nais ipabusisi ng mambabatas

(North Cotabato/ July 2, 2015) ---Nagpasa ng resolusyon si North Cotabato 2nd District Board Member Noel Baynosa sa Sangguniang Panlalawigan na alamin sa pamamagitan ng congressional inquiry kung anu na ang estado ng Renewable Energy Service Contract o RESC ng Hydro Electric Plant o HEP exploration sa Magpet, North Cotabato.

Sa nasabing panukala, hiniling ng opisyal sa mga kongresista na sina Jesus Sacdalan ng 1st District, Nancy Catamco ng 2nd District, at Ping Tejada ng 3rd District; Rep. Raymond Mendoza ng TUCP at iba pang mga kongresista na magsagawa ng Congressional inquiry sa Department of Energy.

Layunin nito na malaman kung ano na ang kasalukuyang estado ng RESC.

Ginawa ng opisyal ang hakbang dahil hanggang sa ngayon ay wala pa ring natatanggap ang Cotabato Electric Cooperative o COTELCO ng komunikasyon galing sa DOE matapos na nag-expire na umano ang RESC sa Cebu-based Universal Hydro Electric Technologies Incorporated noong nakaraang Mayo.

Maliban dito, gusto ring alamin ni Baynosa ang una ng resolusyong isinulong ng SP Cotabato para sa DOE na ikokonsidera nila ang Cotabato Electric Cooperative o COTELCO na susunod na maging aplikante ng RESC.

Ang planung pagpapatayo ng 10MW HEP Plant sa Kabacan River ay suportado ng Cotabato Provincial Government, Magpet LGU, at mga Brgy sa Pangao-an at Tagbak para sa Cotelco.

Pero ang masakit dito, naunahan ang cooperatiba ng Uni-Hydro Corporation sa pagkuha ng RESC sa DOE noong nakaraang taon dahilan para simulan na ang konstruksyon at pagkuha ng Hydro Electric Power Plant sa Magpet, North Cotabato.