Cotabato PCDO, makiisa sa Cooperative Month ngayong Oktubre

Jimmy Sta. Cruz

AMAS, Kidapawan City (Oct 1) – Handang handa na ang Provincial Cooperatives Development Office o PCDO ng Cotabato sa pagdiriwang ng Cooperative Month ngayong Oktubre.

Ayon kay Dr. Samuel Aquino, Head ng Cotabato PCDO, isa sa mga aktbidad na ito ay ang pagkakaroon nila ng 30-minute radio program na naglalayong ipabatid ang layunin ng PCDO at ang mga hakbang na ginagawa nito para umunlad ang mga kooperatiba sa Cotabato.

Sinabi ni Dr. Aquino na mahalagang malaman ng mga cooperative members ang mga paraan upang maging matagumpay ang kanilang kooperatiba lalo na sa mga nagsisimula pa lamang.

Hinimok rin niya ang mga kooperatiba sa Cotabato na makipag-ugnayan sa PCDO upang maging bahagi sila sa mga programa at proyektong ipinagkakaloob ng Provincial Government of Cotabato.

Kabilang sa kanilang programa ay ang training-seminar para sa mga registered cooperative members tampok ang mga piling resource persons at speakers, livelihood projects at malawakang information dissemination.

Matatandaang nitong nakaraang mga buwan ay nagsagawa rin ng serye ng training-seminar ang PCDO upang palakasin at patatagin pang lalo ang mga kooperatiba.

Ayon naman kay Gov. Emmylou “Lala” Taliño-Mendoza, ang mga kooperatiba ay may mahalagang papel sa pag-unlad ng komunidad kaya’t kailangan suportahan ang mga ito sa pamamamagitan ng mga proyekto.

Nitong nakaraang Sep 1, 2014, centennial ng Cotabato Province ay naging aktibo ang mga registered coops sa lalawigan sa pangunguna ng PCDO sa mga exhibits at products display sa Agri-Center ng Provincial Capitol. (JIMMY STA. CRUZ/PGO Media Center)