(Kabacan, Cotabato/ October 15, 2014) ---Mabagal
man ang pag-usad ng hustisya sa pinaslang na italyanong pari sa ilalim ng
kasalukuyang pamahalaan, matatag at buo pa rin ang loob ng grupong Apo Sandawa
Lumadnung Panaghiusa sa Cotabato (ASLPC) na makakamit nito ang hustisya sa
tamang panahon.
Ito ayon kay Norma Capuyan, tagapangulo ng
ASLPC hindi nila ramdam ang pagod sa paghahanap ng katarungan kay Father Fausto
Tentorio dahil ipinakita umano ng pinaslang na misyonaryo ang walang kapagurang
paglilingkod nito sa mga lumad at magsasaka habang nabubuhay pa ito.
Binigyang diin naman ng babaeng opisyal na
bagaman tatlong taon na ang nakalilipas matapos paslangin si Fr. Pops at
hanggang ngayon ay wala pa ring hustisya hindi titigil ang mga lumad hanggang
makamit ang hustisya.
Aniya, patuloy nitong bibitbitin sa
lansangan ang mga panawagan hanggang sa mabingi ang mga nasa kapangyarihan.
Ngayong Oktubre 17 ang ikatlong taon ng
pagkakapaslang sa paring italyano.
Kaugnay nito, isang malawakang
kilos-protesta naman ang ilulunsad ng grupo bukas bilang porma ng paggunita sa
karumal-dumal na pagpaslang sa misyonaryo.
Tinatayang abot sa libong mamamayang lumad
at magsasaka ang lalahok sa nasabing pagkilos.
Samantala, inaanyayahan naman ng grupong
Justice for Fr. Pops Movement (JPM) ang lahat ng mga Cotabateños na lumahok at
makiisa sa isasagawang misa sa libingan ng pari sa barangay Balindog, Kidapawan
City bukas sa ganap na alas-diyes ng umaga. DXVL NEWS
0 comments:
Mag-post ng isang Komento