P68M Cotabato Provincial Govt. Agri-Center Complex bubuksan na ngayong araw

Written by: Jimmy Santacruz

AMAS, Kidapawan City (Feb 28) – Pormal ng bubuksan ngayong araw ang bagong gusali ng Agri-Center Complex sa Provincial Capitol Compound, Barangay Amas, Kidapawan City.

Ang Agri-Center na nagkakahalaga ng P68M ay binubuo ng Office of the Provincial Agriculturist o OPAG, Office of the Provincial Veterinarian o OPVET at Provincial Cooperatives Development Office o PCDO.

Meron itong Farmers Training Hall para sa mga aktibidad tulad ng seminars, orientations o meetings.

Maliban rito ay mayroong Food Laboratory at Covered Court ang naturang complex.

Tampok sa pagbubukas ng Agri-Center ngayong araw ay ang banal na misa at blessing ng gusali na pangungunahan ni Fr. Nicanor E. Valiente, DCK.

Kasunod nito ay ang pagbibigay ng kanyang inspirational message ni Gov. Emmylou “Lala” J. Taliño-Mendoza sa isang programa kung saan panauhing pandangal si Regional Executive Director Amalia J. Datukan ng Dept. of Agriculture 12.

Inaasahan din ang pagdating ng mga opisyal o representante mula sa iba’t-ibang ahensiya ng national government sa aktibidad.

Ayon kay Gov. Taliño-Mendoza, malaki ang magagawa ng bagong Agri-Center upang mapalakas pa ang serbisyo ng OPAG, OPVET at PCDO sa mga mamamayan.

Malaki rin daw ang inspirasyong dulot nito sa mga opisyal at empleyado ng naturang mga tanggapan dahil sa bago ang kanilang gusali at may mga pasilidad pa para makatulong sa kanilang gawain.

Kaugnay nito, nagpapasalamat ang mga office heads na sina Engr. Eliseo Mangliwan ng OPAG, Dr. Rufino Suropia ng OPVET at ang PCDO sa pagbibigay sa kanila ng bagong gusali na isa umanong malaking hakbang para sa pagbabago at pagpapatuloy ng “Serbisyong Totoo” sa mga Cotabateños.

Mas epektibo raw ang pagsasama nila sa iisang gusali dahil magiging mas madali ang kanilang komunikasyon at koordinasyon sa trabaho. (JIMMY STA. CRUZ/PGO Media Center)