(Midsayap, North Cotabato/ July 4, 2013) ---Sisikaping
tugunan ng pamunuan ng Unang Distrito ng North Cotabato ang mga kahilingan ng
iba’t- ibang grupo na mabigyan ng mga pananim sa ilalim ng Agri- Pangkabuhayan
Para Sa Kapayapaan Program.
Una nang inihayag ni Rep. Jesus Sacdalan na
magpapatuloy ang pamamahagi ng permanenteng pananim sa mga magsasaka at
interesadong grupo katuwang ang Department of Agriculture Regional Office 12.
Aniya, ang mga pananim na ibibigay sa ilalim ng
nasabing programa ay mga punongkahoy na hindi basta- basta puputulin ngunit
magbibigay ng kabuhayan sa mga nagtanim at nangagalaga nito.
Dagdag ng opisyal, ito ay bilang pagsuporta sa
inisyatibo ng pamahalaan na pangalagaan ang kalikasan.
Partikular na isinusulong ngayon sa distrito uno ang
distribusyon ng permanent crops tulad ng rubber, cacao, kape, niyog at iba pang
fruit- bearing trees upang itanim sa mga kabundukan.
Mula taong 2011 hanggang 2013, nabatid na abot sa P12
Milyon pondo ang inilaan mula sa Priority Development Assistance Fund o PDAF
upang itaguyod ang high- value crops development program sa distrito.
Samantala, sinabi naman ni Agri-Pangkabuhayan Focal
Person Nicanor Nanlabi na may kaukulang proseso na dapat sundin ang mga
nagnanais makatanggap ng pananim mula sa programa.
Kailangan din umanong magsumite ng sulat kahilingan
ang mga benepisyaryo at punan ang application form na makukuha sa Congressional
District Office ni Rep. Sacdalan. (Roderick Bautista)
0 comments:
Mag-post ng isang Komento