Responsibilidad, Limitasyon at Accountability paalala ng gobernador sa mga bagong halal ng opisyal ng lalawigan

(Amas, Kidapawan City/ July 1, 2013) ---Binigyang diin ni Cotabato Gov. Emmylou “Lala” Talino Mendoza sa kanyang inaugural speech ang tatlong bagay na dapat isaisip ng mga bagong halal na opisyal ng lalawigan matapos na manumpa ito sa kanyang katungkulan noong Biyernes sa Provincial Gymnasium, Amas, Kidapawan city.

Pinaalalahanan nito ang lahat ng mga bagong opisyal ng lalawigan kasama na ang mga kawani ng gobyerno at lahat ng ahensiya ng pamahalaan na may responsibilidad, limitasyon at accountability ang mga ito.

Tinukoy pa nito na may malaking responsibilidad ang mga bagong opisyal na gagampanan matapos ang eleksiyon.

Sinabi nitong ang barangay may malaking ekspektasyon sa kapitan habang ang tao sa bawat munisipyo ay malaki ang inaasahan sa alkalde at ang tao sa buong probinsiya ay malaki ang ekspektasyon sa gobernador.

Kaugnay nito, dapat ay magtulungan ang bawat isa dahil may limitasyon ang mga inihalal na lideres at dapat ding magpakumbaba ang bawat isa dahil may mga bagay din na hindi alam ang mga ito.

Kaya, hinikaya’t nito ang bawat isa na magbigay ng kanilang mungkahi para lalo pang mapagbuti ang pagbibigay serbisyo sa munisipyo at sa probinsiya.

Ang nasabing paalala ay ibinatay ng gobernador sa ibinigay na mensahe ng isang pastor sa oathking na isinagawa sa bayan ng Aleosan, kamakailan.

Aniya, ang lahat ng mga hinahawakan ng mga nasa gobyerno ay mula sa buwis ng tao kaya dapat ding isipin ng nasa pamahalaan ang kanilang accountability.

Nanumpa si Mendoza sa kanyang ikalawang termino sa isinagawang oath taking ceremony kasama si Vice Gov. Dodong Ipong, 3^rd District congressman Ping-ping Tejada, kasama ang sampung mga Sangguniang Panlalawigan members kay RTC Branch 17, Presiding Judge Arvin Sadiri Balagot. (Rhoderick Beñez)