Kidapawan City isinailalim na sa state of calamity; P103M danyos dahil sa dry spell

By: Christine Limos

(Kidapawan City/ May 8, 2015) ---Isinailalim na sa state of calamity ang Kidapawan City dahil sa naranasang dry spell.

Sa panayam ng DXVL news kay CDRRMC head Psalmer Bernalte, inihayag nito na inaprubahan na kahapon ng Sangguniang Panglungsod na ideklarang under state of calamity ang lungsod ng kidapawan dahil sa naranasang apat na buwan na tagtuyot.

Dagdag pa ng opisyal na ang mas naapektuhan ng dry spell ay ang mga walang tanim na laborer at tenant na walang kinita sa loob ng apat na buwan dahil sa pagtigil ng operation ng mga sakahan sa lungsod.

Ipinaliwanag din ni Bernalte na abot sa 103 milyong piso ang kabuuang danyos ng tagtuyot sa agrikultura sa gulay, saging at mga fisher folk. Aniya, 3.2 ektarya ng mga fishpond ang natuyo dahil sa dry spell. Naglaan umano ang lungsod ng 150 thousand para sa fingerlings na ipamimigay sa mga fish folk na apektado ng dry spell.

Ipinaliwanag din ng opisyal na ayon sa batas ng Republic Act 10121, 30 porsyento umano mula sa disaster fund ay ang quick response fund at maaari lamang magamit kapag nasa state of calamity ang isang lugar. Gagamitin lamang umano ang quick response fund sa rescue, rehabilitation at relief.

Samantala, nagkaroon na rin ng intervention ang lungsod at naglaan ng P1Milyon para sa cash for work at nagkaroon din ng water system intervention upang maiwasan ang sakit na diarrhea para sa mga residente na umiigib ng tubig na iniinom sa Malamote river sa area ng Amas, Kidapawan City.