Isang magsasaka, sugatan matapos barilin sa M’lang, North Cotabato; Lalaki sa Antipas, inaresto!

(M’lang, North Cotabato/ February 5, 2013) ---Sugatan ang isang 44 anyos na magsasaka matapos barilin ng isa sa mga suspek ng nakaw-motorsiklo sa M’lang National Highway, North Cotabato dakong alas 5:45 ng umaga nitong Biyernes.

Ayon kay Deputy Investigation P/Insp. Rolando Dillera, kinilala ang biktima na si Edgar Duerme Tolentino, residente ng Purok 5, Brgy. Pulang Lupa, M’lang, North Cotabato.

Nagtamo ng sugat ang biktima sa kanyang ulo at agad naman itong isinugod sa M’lang Doctors Hospital upang mabigyan ng agarang lunas.

Ayon sa report ng M’lang PNP, bigla na lamang hinarang ang biktima ng limang hindi kilalang tao habang minamaneho nito ang kanyang motorsiklo sa Purok Uno ng nabanggit na lugar.

Inutusan umano siyang tumigil at bumaba sa kanyang motorsiklo pero nang hindi niya ito sinunod ay bigla siyang binaril ng isa sa mga suspek. Nang inakala ng mga suspek na patay na ang biktima ay dali-daling tinangay ng mga suspek ang motorsiklong kulay asul na Kawasaki Baja ng biktima at agad tumungo sa hindi matukoy na direksyon.

Dagdag pa ni Dillera, nakilala ng biktima ang isa sa mga suspek nang ipakita ng mga otoridad ang mga larawan ng mga most wanted criminals ng North Cotabato.

Samantala, hindi naman ito pinangalanan ng pulisya habang patuloy pa ang imbestigasyon. Ayon sa report, si Tolentino ang tiyuhin ng pinatay na public school teacher nitong nakaraang dalawang linggo sa bayan ng M’lang ng mga suspetyadong riding-in-tandem.

Samatala, sa Antipas, North Cotabato naman ay inaresto ang isang Allan Carcillar Pedroso, akusado sa kasong pagnanakaw at residente ng Brgy. Dolores, Antipas dakong alas 4 ng hapon nitong Biyernes.

Ayon kay Antipas COP Felix Fornan, ang nabanggit na suspek ay naaresto sa bisa ng warrant of arrest na ipinalabas noong 2012 ni Judge Arvin Balagot ng Regional Trial Court Branch 17. Debby Piñero, DXVL News!