(Kabacan, North Cotabato/ August 13,
2015) ---Muling iginiit ng pamunuan ng Moro Islamic Liberation Front o MILF
na malaki-laking usapan pa ang mangyayari kung sakali mang hindi maibabalik
ang ilang tinanggal na probisyon ng Bangsamoro Basic Law.
Ayon kay North Cotabato Local
Monitoring Team Jabib Guiabar sa panayam ng DXVL News, kanyang iginiit na ang
kanilang bersiyon ng BBL ang siyang dapat na ipasa at wala nang dapat tanggalin
sa mga probisyon nito.
Napag-usapan na umano ito ng MILF at
ng Government Peace Panel.
Kanyang ring pinasinungalingan ang
pahayag ng ilang mambabatas na hindi ito naikonsulta sa kanila.
Anya, nagkaroon na umano ng mga serye
ng konsultasyon sa mga kinauukulang tanggapan.
Hindi rin umano nila matatanggap ang
bersiyon ng BBL ni Sen. Bong-bong Marcus.
Sariling kapakanan lang umano ang
iniisip ng senador sapagkat ayaw nitong maipasa ang BBL sa panahon ng
kasalukuyang administrasyon.
Hindi naman malinaw mula sa opisyal
ang gagawing hakbang ng MILF kung sakali mang hindi maipapasa ang kanilang
pinanghahawakang bersyon ng BBL.
Ginawa ng opisyal ang pahayag matapos na
muling humihirit ang Moro Islamic Liberation Front (MILF) sa liderato ng Kamara
na maibalik ang lahat ng mga probisyong inalis ng House ad hoc committee on the
Bangsamoro sa BBL.
Ayon kay House majority leader Neptali
Gonzales, sumulat si MILF chief negotiator Mohager Iqbal kay House Speaker
Feliciano Belmonte at maging kay ad hoc committee chairman Rufus Rodriguez.
Pero ayon kay Gonzales, nagpulong at nakabuo
na ng consensus sina Rodriguez at ilang vice chairmen ng ad hoc committe na
hindi mapapagbigyan ang kagustuhan ng MILF.
Sa ngayon, ang prayoridad umano ng Kamara ay
ang mapagtibay ang BBL na ang mga probisyon ay alinsunod sa saligang batas.
Nauunawaan umano ni Gonzales ang sentimyento
ni Iqbal pero nag-ugat umano ang problemang ito sa kabiguan ng peace panels ng
dalawang panig ng kunsultahin ang Kongreso sa gitna noon ng negosasyon.
Giit naman ni Guiabar na kasinungalingan ang
naging pahayag ni Gonzales. Rhoderick
Beñez & Mark Anthony Pispis
0 comments:
Mag-post ng isang Komento